BAKI, AzerVoice
İsrailin ifrat sağçı milli təhlükəsizlik naziri İtmar Ben-Qvir hökumətinin Qəzza zolağında atəşkəsin təmin etmək və HƏMAS-la əsir mübadiləsi razılaşması imzalamaq niyyətini sərt şəkildə tənqid edib.
AzerVoice xəbər verir ki. bu barədə İsrail KİV məlumat yayıb.
Məlumata görə, Ben-Qvir hazırda müzakirə edilən atəşkəs təklifini təhlükəli adlandırıb və bildirib ki, bu razılaşma HƏMAS-a döyüş meydanında əldə edə bilmədiyi üstünlükləri qazandıracaq.
O, eyni zamanda, bu razılaşmanın ABŞ prezidenti Donald Trampın yanaşmaları ilə uyğun gəlib-gəlmədiyindən əmin olmadığını deyib.
Xatırladaq ki, İsrailin baş naziri Benyamin Netanyahu dünən ABŞ-a səfəri öncəsi verdiyi açıqlamada, İsrailin Qəzza zolağında atəşkəs razılaşmasına öz şərtləri əsasında nail olmağa çalışdığını bildirib.
Əlavə edək ki, Qəzza Səhiyyə Nazirliyi bu gün yaydığı məlumatda 2023-cü ilin 7 oktyabr tarixindən bəri davam edən münaqişə nəticəsində həlak olan fələstinlilərin sayının 57 523 nəfərə çatdığını bildirib.