BAKI, AzerVoice
Kolumbiyanın Xarici İşlər Naziri Laura Sarabiya, yanvar ayının sonlarından etibarən bu vəzifəni icra edərək, istefa verdiyini açıqlayıb.
AzerVoice xəbər verir ki, bu barədə o, X sosial şəbəkəsində paylaşım edib.
İstefa qərarının səbəbi, hökumət daxilində pasportların istehsalı üçün müqavilə verilməsi məsələsində yaranan fikir ayrılıqlarıdır.
Sarabiya Kolumbiya prezidenti Qustavo Petroya ünvanladığı məktubda bildirib: "Son günlər qəbul edilən qərarlarla razı deyiləm və institusional hörmət prinsipləri baxımından onları dəstəkləmək mümkün deyil."
Məlumata görə, Sarabiya avqustun 31-də bitən pasport istehsalı müqaviləsinin "Thomas Greg & Sons" şirkəti ilə uzadılmasını dəstəkləyirdi, lakin prezident Petro şəxsi müdaxiləsi nəticəsində bu işi sentyabrın 1-dən etibarən Kolumbiyanın Milli Tipoqrafiya Sisteminə vermək qərarına gəldi.
Qeyd edək ki, 2022-ci ildən bəri Sarabiya, prezident Petro administrasiyasında bir sıra mühüm vəzifələri icra edib.
Əvvəllər Kolumbiyanın keçmiş Xarici İşlər Naziri Alvaro Leyva, prezident Qustavo Petronu narkotik istifadəsində ittiham etmişdi.
