BAKI, AzerVoice, Nailə Babazadə

Kolumbiya prezidenti Qustavo Petro, ABŞ-ın Karib dənizi və Sakit okeandakı əməliyyatlarına etiraz edərək, ABŞ təhlükəsizlik qurumları ilə əlaqə və kəşfiyyat məlumatlarının paylaşılmasının dayandırıldığını açıqlayıb.

AzerVoice xəbər verir ki, prezident Petro bu barədə ABŞ mərkəzli X sosial media platformasındakı hesabında paylaşım edib və ABŞ-ın bölgədə apardığı əməliyyatlara toxunub.

“İctimai təhlükəsizlik qurumunun bütün kəşfiyyat strukturlarına ABŞ təhlükəsizlik orqanları ilə əlaqə və məlumat mübadiləsini dayandırmaq göstərişi verdim,” – deyə Petro bildirib.

O, həmçinin vurğulayıb ki, ABŞ-ın Karib dənizi və Sakit okeanda fəaliyyət göstərən gəmilərə qarşı raket hücumları davam etdiyi müddətdə bu qərar qüvvədə qalacaq.

Prezidentin sözlərinə görə, “narkotiklərlə mübarizə, Karib xalqlarının insan haqlarına üstünlük verilərək aparılmalıdır.”

Kolumbiya mətbuatının məlumatına əsasən, ABŞ-ın narkotik daşıdığı iddia edilən gəmilərə endirdiyi hücumlar nəticəsində Karib dənizi və Sakit okean bölgəsində təxminən 70 nəfər həlak olub.