BAKI, AzerVoice
Beynəlxalq Atom Enerjisi Agentliyi (MAQATE), İranın Araak şəhəri yaxınlığında inşa edilən nüvə obyektinə İsrailin hava hücumu nəticəsində "əsas binalara ziyan dəydiyini" təsdiqləyib.
AzerVoice xəbər verir ki, agentliyin bəyanatında obyektin hazırda nüvə materialı saxlamadığı bildirilsə də, hadisə ilə bağlı radiasiya riski istisna olunmur.
İsrail hərbi təyyarələrinin cümə axşamı həyata keçirdiyi bombalı hücumun hədəfi olan Araak reaktoru, Tehranın cənub-qərbində – təxminən 250 kilometr məsafədə yerləşir. Bu cür reaktorlar, əsasən elmi tədqiqat məqsədləri üçün istifadə olunsa da, nəticə etibarilə plutonium hasil edir – bu maddə nüvə silahlarının hazırlanmasında istifadə oluna bilər.
“İzlənilən zərbələr nəticəsində ciddi radioloji insident baş verməyib, lakin radioloji qəza ehtimalı hələ də qalır” - deyə MAQATE-nin baş direktoru Rafael Qrossi bildirib.
Qeyd edək ki, Rafael Qrossi daha əvvəl verdiyi açıqlamada, İranın sistematik şəkildə nüvə silahı hazırladığına dair hər hansı sübutun olmadığını bəyan edib. Buna baxmayaraq, Araakdakı hücum beynəlxalq ictimaiyyətdə narahatlığa səbəb olub və regionda gərginliyi daha da artırıb.
