BAKI, AzerVoice

Qəzzada yanacaq blokadası davam etsə, uşaqlar susuzluqdan öləcək.

AzerVoice xəbər verir ki, BMT-nin Uşaq Fondu (UNICEF) Qəzzada mövcud yanacaq blokadasının davam etməsinin fəlakətli nəticələrə gətirib çıxaracağı barədə xəbərdarlıq edib.

Fondun sözçüsü Ceyms Elder bildirib ki, içməli su istehsal edən müəssisələrin əksəriyyəti yanacaq çatışmazlığı səbəbindən fəaliyyətini dayandırmaq üzrədir və bu, uşaqların susuzluqdan ölüm riski ilə üz-üzə qalması deməkdir.

"Qəzza hazırda texnogen quraqlıqla qarşı-qarşıyadır. 217 su obyektindən yalnız 87-si fəaliyyət göstərir. Qalanlar bir neçə həftə ərzində sıradan çıxacaq. Su, oksigen və xəstəxana generatorları üçün yanacaq həyati əhəmiyyət daşıyır. Əgər blokada aradan qaldırılmasa, bu, uşaqlar üçün ölüm hökmü olacaq", – deyə Elder əlavə edib.

Qeyd edək ki, UNICEF-in məlumatına görə, aprel-may aylarında qida çatışmazlığı səbəbilə müalicə alan uşaqların sayında 50 faizlik artım qeydə alınıb. UNICEF yanacaq təchizatının siyasi səbəblərlə dayandırıldığını və bu vəziyyətin dərhal dəyişdirilməli olduğunu vurğulayıb.