BAKI, AzerVoice
Texas ştatı 18 yaşdan kiçiklər üçün sosial mediaya qadağa tətbiq etməyə hazırlaşır.
AzerVoice xəbər verir ki, Texasda
təqdim olunan yeni qanun layihəsi 18 yaşadək şəxslərin sosial media
platformalarına girişini tamamilə qadağan etməyi nəzərdə tutur.
Layihəyə əsasən, sosial media şirkətləri istifadəçilərin yaşını
yoxlamaqla yanaşı, valideynlərə uşaqlarının hesablarını bağlamaq
hüququ verməlidirlər.
Qanun qüvvəyə minərsə, platformalar bu tələbləri yerinə yetirmədikdə "aldadıcı kommersiya praktikası" pozuntusu kimi cinayət məsuliyyəti daşıyacaq. Texas Baş Prokurorluğu bu halda həm cərimə tətbiq edə, həm də məhkəmə yolu ilə kompensasiya tələb edə biləcək.
Xatırladaq ki, son iki ildə Florida, Corciya, Tennessi və Luiziana kimi digər ştatlar da sosial mediadan istifadəyə valideyn icazəsi tələb edən qanunlar qəbul edib. Benzer qanunvericilik Nebraska və Konnektikutda da təsdiqlənib. 2023-cü ildə Utahda qəbul edilən sərt sosial media məhdudiyyətləri isə hüquqi mübahisələrdən sonra qismən yumşaldılıb.
Texas qubernatoru Qreq Abbottun sözçüsü Endryu Mahaleris bildirib ki, uşaqların rəqəmsal təhlükəsizliyi qubernator üçün prioritetdir və o, qanun layihəsini diqqətlə dəyərləndirəcək.
Texnologiya şirkətləri isə bu cür məhdudiyyətlərə qarşı çıxır. Meta, TikTok və X-in üzv olduğu NetChoice lobbisi bu tip qanun layihələrini "onlayn təhlükəsizlik adı altında senzura rejimi" adlandıraraq bir neçə ştatda məhkəmə iddiaları qaldırıb.
Qeyd edək ki, texnoloji şirkətlər də müəyyən məhdudlaşdırıcı tədbirlər görür. Məsələn, Meta və TikTok azyaşlı istifadəçilər üçün ekran vaxtını məhdudlaşdırıb və məzmun filtrləri tətbiq edib.
ABŞ Senatında da uşaqların sosial mediaya çıxışını məhdudlaşdıran qanun təşəbbüsləri gündəmdədir. Demokrat senator Brian Schatz 13 yaşdan kiçiklər üçün sosial media hesablarının tamamilə qadağan edilməsini təklif edib. Respublikaçı Tom Kotton və Demokrat Tim Kaine isə məktəblərdə mobil telefon istifadəsini məhdudlaşdırmaq üçün yeni təşəbbüslərlə çıxış ediblər.
