BAKI, AzerVoice

Tokio Universiteti Harvardın qərarından təsirlənən əcnəbi tələbələri qəbul etməyə hazırlaşır.

AzerVoice xəbər verir ki, Yaponiyanın Tokio Universiteti ABŞ-da Donald Tramp administrasiyasının Harvard Universitetinin beynəlxalq tələbə qəbulunu dayandırmaq planından təsirlənən xarici tələbələri müvəqqəti qəbul etməyi nəzərdən keçirdiyini açıqlayıb.

Universitet bəyanat yayaraq bildirib ki, belə tələbələr təhsilini davam etdirməkdə çətinlik yaşadığı halda, onlara Tokio Universitetində müvəqqəti təhsil imkanı verilə bilər. Universitet daha əvvəl də 2022-ci ildə Rusiya-Ukrayna müharibəsi səbəbindən ölkəsini tərk edən tələbələrə bənzər şəkildə dəstək göstərmişdi.

Qeyd edək ki, ABŞ-da Tramp administrasiyası kampus etirazlarını əsas gətirərək, müxtəlif universitetlər, o cümlədən Harvard üçün federal maliyyəni dondurmaqla hədələyib. Bunun nəticəsində Harvard Universitetinə ayrılan 2,2 milyard dollar maliyyənin və 60 milyon dollarlıq müqavilə haqqının dondurulması planlaşdırılıb. Universitet isə bu qərarın qanunsuz olduğunu bildirərək məhkəməyə müraciət edib.

Hazırda Boston məhkəməsi bu qərarı müvəqqəti olaraq dayandırıb.