BAKI,AzerVoice
İran Xarici İşlər Nazirliyinin sözçüsü İsmayıl Baqai bildirib ki,
Tehran ABŞ prezidenti Donald Trampın məktubunun məzmununu araşdırır və
“müxtəlif aspektlər dəyərləndirildikdən sonra cavab vermək barədə
qərar qəbul ediləcək”.
Rəsmi İRNA agentliyinin verdiyi xəbərə görə, Baqai qeyd edib ki,
məktub dünən axşam alınıb və hazırda araşdırma mərhələsindədir.
“Müvafiq qiymətləndirmələr aparıldıqdan sonra cavabla bağlı qərar
veriləcək” - deyə o bildirib.
Ötən həftə Donald Tramp İranın ali lideri Əli Xameneiyə məktub
göndərdiyini və burada nüvə proqramı ilə bağlı danışıqlar təklif
etdiyini açıqlamışdı. Bununla belə, o, “İranla iki şəkildə
davranmaq olar: ya hərbi yolla, ya da razılaşmaya nail olmaqla”
deyə xəbərdarlıq etmişdi.
İranın xarici işlər naziri Abbas Araqçi isə verdiyi müsahibədə
bildirib ki, “əgər biz maksimal təzyiqlər altında danışıqlara
girsək, zəif mövqedə olacağıq və heç bir nəticə əldə
etməyəcəyik”.
“Qarşı tərəfi təzyiq siyasətinin nəticə vermədiyinə inandırmalıyıq,
yalnız bundan sonra bərabər şərtlər əsasında danışıqlar
mümkündür”.-deyə o qeyd edib.
İranın ali lideri Əli Xamenei isə çərşənbə günü Tramp administrasiyası ilə aparılacaq hər hansı danışıqların sanksiyaların davamına və İrana qarşı təzyiqlərin artmasına səbəb olacağını bildirib.
