BAKI,AzerVoice

Qədim sivilizasiyalar haqqında maraqlı faktlar bəşər tarixində mövcud olmuş ən böyük imperiyalar və xalqlar barədə daha dərindən məlumat almaq üçün əla fürsət yaradır. Arxeoloqlar əsrlər boyu apardıqları araşdırmalar nəticəsində qədim insanların necə yaşadıqlarını, düşüncələrini və cəmiyyətlərini necə formalaşdırdıqlarını anlamağa imkan verən saysız-hesabsız heyrətamiz artefaktlar aşkar ediblər. Lakin bu məlumatların hamısı hər zaman geniş oxucu kütləsi ilə paylaşılmır.

AzerVoice oxucularına qədim sivilizasiyalarla bağlı ən maraqlı və diqqətçəkən faktları təqdim edir:

Bir çox qədim xalqlarda insan qurbanı adi hal sayılırdı. Xüsusilə Mayyalar, İnkalar və Azteklər demək olar ki, bütün dini bayramlarda insan qurbanları verirdilər.

Qədim Çin sivilizasiyasında kağızdan istifadə ilə yanaşı, bu gün də mövcud olan sığorta sisteminə bənzər mexanizmlər mövcud idi və bu sistemlər maddi təminat vasitəsi kimi istifadə olunurdu.

Piramidaları yalnız qədim misirlilərin tikdiyini düşünmək düzgün deyil. Meksika və Peru ərazilərində də müxtəlif qədim sivilizasiyalara məxsus çoxsaylı piramidalar mövcuddur.

Qədim Yunanıstanda insanlar ağır cinayətlərə görə çox vaxt edam edilmir, şəhərdən sürgün olunurdular. Hesab edilirdi ki, bu cəza forması cinayətkar üçün daha ağır və əzablı nəticələrə səbəb olacaq.

Bir çox qədim xalqlar Günəşi ali tanrı hesab edir və ona sitayiş edirdilər.

Qədim Maya sivilizasiyası astronomiya və cərrahiyyə sahələrində yüksək biliklərə malik olsa da, təkər anlayışını tanımırdı. Arxeoloqlar indiyədək mayyalıların təkərdən istifadə etdiyini sübut edən heç bir artefakt aşkar etməyiblər.

Tarixdə bilinən ən qədim sivilizasiya eramızdan əvvəl IV–V minilliklərdə mövcud olmuş Şumer sivilizasiyası hesab edilir.

Aralıq dənizinin dibində aparılan tədqiqatlar nəticəsində 200-dən çox qədim şəhərin qalıqları aşkarlanıb.

Qədim Misirdə qadınlar və kişilər hüquq baxımından demək olar ki, bərabər hesab olunurdular.

Müasir Laos ərazisində naməlum qədim sivilizasiyaya aid olduğu düşünülən nəhəng daş küplər tapılıb. Alimlər bu küplərin təyinatını hələ də müəyyən edə bilməyiblər. Küplərin təxminən 2000 il yaşı olduğu ehtimal olunur.

Misir piramidaları o qədər dəqiqliklə inşa edilib ki, daş blokların arasına hətta ülgüc belə yerləşdirmək mümkün deyil.

Hindistanda hələ eramızdan əvvəl V əsrdə yaşayış evlərində kanalizasiya sistemi mövcud idi.

Roma sivilizasiyası mühəndislik və texnologiya sahəsində böyük nailiyyətlər əldə etmiş, xüsusilə daş yolları ilə məşhurlaşmışdı. Bu yolların bir qismi bu gün də istifadə olunur.

Xeops Piramidası dünyanın Yeddi Möcüzəsindən günümüzə qədər gəlib çatan yeganə abidədir.