BAKI, AzerVoice, Nailə Babazadə

İran Xarici İşlər Nazirliyinin sözçüsü İsmayıl Bəqayi ABŞ-ın İrana hərbi hücuma hazırlaşması ilə bağlı iddialara sərt cavab verib.

AzerVoice xəbər verir ki, Bəqayi həftəlik mətbuat konfransında Tehranın istənilən təcavüzə "genişmiqyaslı və peşmanedici" cavab verəcəyini bəyan edib.

ABŞ-ın hücum planları ilə bağlı sualı cavablandıran Bəqayi bildirib: "İran həm öz potensialına və imkanlarına, həm də keçmiş təcrübələrinə, o cümlədən iyun ayında baş verənlərə güvənir. Hazırda daha güclü vəziyyətdəyik. İran hər cür hücuma genişmiqyaslı qarşılıq verəcək".

Sözçü regiona hərbi qüvvələrin və döyüş gəmilərinin göndərilməsini beynəlxalq hüququn pozulması adlandırıb.

"Döyüş gəmilərinin bölgəyə göndərilməsi İranın öz varlığını müdafiə etmək iradəsi və qətiyyətində ən kiçik zəiflik belə yaratmayacaq". - deyə Bəqayi qeyd edib.

Hazırda ölkəsinin "hibrid müharibə" ilə üz-üzə olduğunu deyən Bəqayi qeyd edib ki, son aylarda ABŞ və İsrail mənbəli təhdidlər artıb. O vurğulayıb ki, region ölkələri təhlükəsizlik probleminin hədəfinin yalnız İran olmadığını və bunun hamı üçün ortaq narahatlıq yaratdığını anlayırlar.

Bəqayi həmçinin İranın xarici işlər naziri Abbas Arakçı ilə ABŞ Prezidenti Donald Trampın Yaxın Şərq üzrə xüsusi nümayəndəsi Stiv Vitkoff arasında mesaj mübadiləsi aparıldığına dair iddiaları da qəti şəkildə təkzib edib.