BAKI, AzerVoice, Nailə Babazadə

Fələstin Prezidenti Mahmud Abbasın müşaviri Dr. Mahmud əl-Həbbaş Qəzza zolağındakı mövcud vəziyyəti və yeni yaradılan Sülh Şurasını Fələstin tərəfinin seçimi olmadığını bəyan edib.

AzerVoice xəbər verir ki, əl-Həbbaş "Asharq Al-Awsat" qəzetinə verdiyi açıqlamada bu mexanizmin BMT Təhlükəsizlik Şurası tərəfindən müəyyən edilmiş müvəqqəti bir tənzimləmə olduğunu bildirib. O qeyd edib ki, Fələstin rəhbərliyi bu planı qəti şəkildə rədd etsə də, hazırkı şəraitdə bunu "iki şərdən daha az olanı" kimi qəbul etmək məcburiyyətində qalıblar. Müşavirin sözlərinə görə, bu qərar qətliamları dayandırmaq və Fələstin dövlətinin qurulmasına aparan potensial bir yol açmaq məqsədilə verilib.

Xatırladaq ki, ABŞ Prezidenti Donald Tramp ötən həftə Qəzzadakı növbəti addımlara nəzarət etmək üçün dünya liderlərindən ibarət yeni qurum — Sülh Şurasının yaradıldığını elan edib. Ağ Evin məlumatına görə, Trampın sədrlik edəcəyi əsas şura ilə yanaşı, bölgəni idarə edəcək fələstinli texnokratlardan ibarət komitə və məsləhətçi funksiyasını yerinə yetirəcək icraçı şura fəaliyyət göstərəcək.

Əl-Həbbaş bu reallığın yaranmasında həm İsrailin təcavüzünü, həm də Həmasın "ehtiyatsız macərasını" günahlandırıb. O vurğulayıb ki, bu keçid dövrü tənzimləməsi fələstinlilərin Qəzza zolağında qalmasını təmin etmək və məcburi köçkünlüyün qarşısını almaq baxımından ən az zərərli variantdır.