BAKI,AzerVoice, Fərid Mikayılov
Livanın xarici işlər naziri Yusif Raci İranın xarici işlər naziri Abbas Əraqçinin Tehrana səfər dəvətini geri çevirib və görüşün üçüncü, neytral ölkədə keçirilməsini təklif edib.
AzerVoice xəbər verir ki, nazir Raci bu barədə çərşənbə günü sosial şəbəkə X-də paylaşım edərək hazırkı şərait səbəbindən “dəvəti qəbul edə bilmədiyini” bildirib.
O, bunun dialoqun rədd edilməsi kimi anlaşılmamalı olduğunu, sadəcə “münbit şəraitin yaranmadığını” vurğulayıb.
Nazir bildirib ki, İranla hər hansı yeni diplomatik təmas Livanın suverenliyinə hörmət, daxili işlərinə qarışmamaq və dövlətlərarası münasibətləri tənzimləyən beynəlxalq prinsiplərə əməl olunması kimi əsas meyarlara dayanmalıdır.
Beyrut rəsmiləri bir daha xatırladıb ki, Livan Tehranla diplomatik kanalları açıq saxladığı halda, ölkənin daxili proseslərinə hər hansı xarici müdaxiləni qəbul etmir və bu mövqe dəfələrlə İrandan gələn nümayəndə heyətlərinə çatdırılıb.
Xatırladaq ki, İran Ali Təhlükəsizlik Şurasının katibi Əli Laricaninin avqust ayında Beyruta səfəri zamanı tərəflər arasında gərginlik açıq şəkildə hiss olunmuşdu. Laricani “vaxtının olmadığı” üçün Raci ilə görüşmədiyini demiş, nazir isə buna cavab olaraq “Mənim vaxtım olsaydı belə, onunla görüşməzdim” ifadəsini səsləndirmişdi.
Livanın sabiq xarici işlər naziri Fəris Buəyz bildirib ki, Racinin mövqeyi Tehran-Beyrut münasibətlərinin “tam formalaşmadığı” barədə aydın diplomatik mesajdır. Onun sözlərinə görə, tərəflər arasında ciddi fikir ayrılığı olduqda ilk görüşlər adətən üçüncü ölkədə keçirilir.
Buəyz hesab edir ki, Racinin mövqeyi həm Prezident Cozef Aun, həm də Baş nazir Nəvaf Səlamın siyasi xəttinə uyğundur və İranın Livandakı müəyyən qruplara dəstəyini dayandırmalı olduğuna dair dolaylı siqnal kimi qiymətləndirilə bilər.
Livan rəsmiləri dəfələrlə İranı ölkənin daxili işlərinə qarışmaqda ittiham edib. Avqust ayında keçirilən görüşdə Prezident Aun yenidən bəyan etmişdi ki, Livanda heç bir qrup xarici dəstəyə və ya silahlı fəaliyyətə arxalana bilməz.
Bəzi müşahidəçilər Racinin mövqeyini İranın Livandakı təsirinin azalması kimi qiymətləndirsələr də, Fəris Buəyz prosesin daha çox ABŞ–İran münasibətlərinin trayektoriyasından asılı olduğunu deyib. Onun sözlərinə görə, iki ölkə arasındakı dialoq gərginləşdikcə Livanda da vəziyyət sərtləşir, əksinə yumşaldıqda Beyrut müəyyən rahatlıq yaşayır.