BAKI,AzerVoice, Fərid Mikayılov

İran Xarici İşlər Nazirliyi ABŞ-ın Venesuelaya qarşı həyata keçirdiyi hərbi hücumu qətiyyətlə pisləyərək, bu addımı ölkənin milli suverenliyinin və ərazi bütövlüyünün açıq şəkildə pozulması, həmçinin regional və beynəlxalq sülh və təhlükəsizliyə ciddi təhdid kimi qiymətləndirib.

AzerVoice xəbər verir ki, ABŞ hərbi qüvvələri gün ərzində Venesuelanın paytaxtı Karakasla yanaşı Miranda, Araqua və La Quayra ştatlarında bir sıra mövqelərə zərbələr endirib.

Bəyanatda qeyd edilir ki, ABŞ-ın hərbi hücumu Birləşmiş Millətlər Təşkilatının Nizamnaməsinin əsas prinsiplərinin, xüsusilə də güc tətbiqini qadağan edən 2-ci maddənin 4-cü bəndinin açıq şəkildə pozulmasıdır. İran XİN bu hücumu “aqressiya aktı” adlandıraraq, BMT və beynəlxalq hüququn aliliyini müdafiə edən bütün dövlətlər tərəfindən dərhal və birmənalı şəkildə pislənməli olduğunu vurğulayıb.

İran Xarici İşlər Nazirliyi, həmçinin bildirib ki, BMT-yə üzv müstəqil bir dövlətə qarşı bu cür hərbi aqressiya regional və beynəlxalq sülh və təhlükəsizliyə açıq təhlükə yaradır və nəticələri bütün beynəlxalq sistemi təsirləndirə, BMT Nizamnaməsinə əsaslanan beynəlxalq nizamın daha da zəifləməsinə səbəb ola bilər.

Bəyanatda Venesuelanın milli suverenliyini, ərazi bütövlüyünü və öz müqəddəratını təyin etmək hüququnu müdafiə etmək haqqı xatırladılıb. Eyni zamanda, BMT və xüsusilə Təhlükəsizlik Şurası daxil olmaqla, bütün dövlətlərin və beynəlxalq təşkilatların ABŞ-ın qanunsuz hərbi hücumunun dərhal dayandırılması üçün hüquqi və mənəvi məsuliyyət daşıdığı qeyd olunub.

Nazirlik sonda bu hərbi hücum zamanı törədilmiş cinayətlərin planlaşdırıcılarının və icraçılarının məsuliyyətə cəlb edilməsi üçün konkret tədbirlərin görülməsinin vacibliyini vurğulayıb.