BAKI, AzerVoice, Nailə Babazadə

İsrail hərbi təyyarələri Livanın cənub və şərq bölgələrinə hava hücumları həyata keçirib.

AzerVoice xəbər verir ki, İsrail 27 noyabr 2024-cü ildə əldə olunmuş atəşkəs razılaşmasına baxmayaraq, Livana qarşı hücumlarını davam etdirir.

İsrail hərbi təyyarələri ölkənin cənubundakı Çarmak, Mahmhudiye, Zarariye, Ansar, Tuffahta, Beyseriyye, Rafi Dağı, Saced, Reyhan, Armata, Ceba, Tebne və Vadi Bengol bölgələrini hədəf alıb.

Bundan əlavə, Livanın şərqindəki Qərbi Bekaa bölgəsində Zalaya Vadisinə də 4 hava hücumu həyata keçirilib.

Livan hakimiyyətindən hücumlarda itki olub-olmaması ilə bağlı hələlik rəsmi açıqlama verilməyib.

Qeyd edək ki, İsrail oktyabr 2023-cü ildə Livana qarşı hücumlar başladıb, sentyabr 2024-cü ildə isə bu hücumlar genişmiqyaslı savaşa çevrilmişdi. Savaş nəticəsində 4 mindən çox insan həyatını itirmiş, təxminən 17 min nəfər yaralanmışdı.

27 noyabr 2024-cü ildə Livan və İsrail arasında əldə olunmuş atəşkəs razılaşmasına baxmayaraq, İsrailin atəşkəsi minlərlə dəfə pozduğu bildirilib.

İsrail 8 oktyabr 2023-cü ildən sonra Livanda ələ keçirdiyi 5 yüksəkliyi hələ də işğal altında saxlayır və onlarca ildir nəzarət etdiyi bəzi bölgələrdəki mövcudluğunu davam etdirir.

Livan Səhiyyə Nazirliyi İsrailin 27 noyabr 2024-dən 27 noyabr 2025-dək ölkəyə etdiyi hücumlarda 335 nəfərin həyatını itirdiyini, 973 nəfərin yaralandığını açıqlayıb.