BAKI, AzerVoice, Nailə Babazadə

İsrail ordusu Qəzza zolağının şimalında yerləşən Qəzza şəhərində son 72 saat ərzində hər biri ən azı 7 mərtəbədən ibarət olan və ümumilikdə 209 mənzili əhatə edən 5 çoxmərtəbəli binanı bombalayıb.

AzerVoice xəbər verir ki, bu barədə Qəzzadakı Mülki Müdafiə İdarəsi yazılı açıqlama yayıb. Bildirilib ki, mövcud humanitar böhran şəraitində hər bir mənzildə orta hesabla 20 nəfər yaşayırdı. Bu da ən azı 4 min 100 qadın, uşaq və yaşlının evsiz qaldığı deməkdir.

Açıqlamada əlavə olunur ki, yerindən edilən insanlar üçün qurulmuş və hər biri 10 nəfərlik olan 350 çadır da İsrail hücumları nəticəsində dağıdılıb. Nəticədə təxminən 3 min 500 nəfər daha sığınacaqdan məhrum olub.

Son 72 saat ərzində Qəzza şəhərində təxminən 550 ailə – yəni 7 min 600 nəfər – evsiz qalıb. Açıqlamada bu şəxslərin ən əsas həyat tələbatlarından məhrum bir vəziyyətdə, ölüm, aclıq və dözülməz istilərlə mübarizə apardıqları bildirilir.

Mülki Müdafiə İdarəsi beynəlxalq ictimaiyyətə çağırış edərək vurğulayıb:

“Dünya Qəzza şəhərindən yüksələn yardım çağırışlarını səssizcə izləyir. Minlərlə günahsız insanın həyatını xilas etmək üçün dərhal müdaxilə edin.”

Xatırladaq ki, İsrail ordusu son günlərdə işğalçı hücumları çərçivəsində Qəzza şəhərindəki çoxmərtəbəli yaşayış binalarını hava zərbələri ilə tamamilə yerlə bir edir.