BAKI, AzerVoice, Nailə Babazadə

İsrailin Qəzzaya hücumlarında son 24 saatda 83 fələstinli həyatınıitirib, 223 nəfər yaralanıb

AzerVoice xəbər verir ki, İsrail ordusunun Qəzza zolağına davam edən hücumları nəticəsində son 24 saat ərzində 83 fələstinli həlak olub, 223 nəfər yaralanıb. Bu barədə Qəzzədəki Səhiyyə Nazirliyi yazılı açıqlama yayıb.

Məlumata görə, İsrail ordusunun 19 yanvarda əldə olunan atəşkəsi pozaraq 18 martdan bu yana həyata keçirdiyi hücumlarda ümumilikdə 12 min 59 fələstinli həyatını itirib, 51 min 278 nəfər yaralanıb.

Son 24 saat ərzində humanitar yardım üçün növbədə gözləyən fələstinlilərə qarşı həyata keçirilən hücumlarda daha 14 nəfər həlak olub, 37 nəfər yaralanıb.

Bundan əlavə, İsrail və ABŞ-ın nəzarətində olan yardım paylanma nöqtələrində həyata keçirilən sistematik hücumlarda 27 maydan bu yana 2 min 444 nəfər öldürülüb, 17 min 831 nəfər isə yaralanıb.

Qeyd edilir ki, İsrailin 7 oktyabr 2023-cü ildən bəri Qəzzə zolağına həyata keçirdiyi hücumlarda həlak olan fələstinlilərin ümumi sayı 64 min 605 nəfərə, yaralıların sayı isə 163 min 319 nəfərə çatıb.

Səhiyyə Nazirliyinin məlumatına görə, Qəzzədə hələ də minlərlə cəsəd dağıntılar altında qalıb və onların dəqiq sayı məlum deyil.