BAKI, AzerVoice, Nailə Babazadə

İsrail ordusu bu gün səhər saatlarından etibarən Qəzza zolağının müxtəlif bölgələrinə – şimal, cənub və mərkəz hissələrinə yönəlik hücumlar həyata keçirib. Xəstəxana mənbələri və görən şahidlərin verdiyi məlumata görə, hücumlarda ümumilikdə 25 fələstinli həyatını itirib, çox sayda insan yaralanıb.

AzerVoice xəbər verir ki, Qəzzə şəhərinin şimal-qərbində yerləşən Şeyx Rıdvan məhəlləsində, Əhməd Yasin küçəsindəki iki yaşayış evinə endirilən hava zərbəsində 3 fələstinli ölüb, bir çoxu isə yaralanıb. Tammus qovşağı yaxınlığında yerindən edilmiş insanların sığındığı çadırın pilotsuz uçuş aparatı (PUA) tərəfindən hədəf alınması nəticəsində daha 3 nəfər həyatını itirib.

Qəzzə şəhərinin mərkəzinin şimalında, Yermuk küçəsində yerləşən bir evə yönəldilmiş ağır bombardmanda isə 5 fələstinli ölüb. Şəhərin qərbindəki Şalihat bölgəsində məcburi köçkünlərin yaşadığı çadıra edilən başqa bir hücum nəticəsində – aralarında bir uşağın da olduğu – 4 nəfər həyatını itirib.

Qəzzənin qərbindəki Rimal məhəlləsində bir mənzilə yönəlik hücumda 2 qardaş ölüb. Bələdiyyə parkı yaxınlığındakı başqa bir binaya edilən zərbədə isə çox sayda fələstinli yaralanıb.

Eyni zamanda, İsrail ordusu Şeyx Rıdvan hovuzu ətrafındakı evləri və binaları bubi tələli robotlar vasitəsilə partlatmağa davam edir. Bölgəyə ardıcıl hava hücumları həyata keçirilir və PUA-lar mülki evlərin damlarına partlayıcı maddələr atır. Bu isə əhali arasında böyük təşviş yaradıb.

Qəzza zolağının mərkəz hissəsində yerləşən Nusayrat qaçqın düşərgəsində isə İsrail ordusunun mülki şəxslərin toplandığı ərazini hədəf alması nəticəsində – aralarında bir qız uşağının da olduğu – 5 fələstinli ölüb, 22 nəfər yaralanıb.

Cənub bölgəsindəki Xan Yunusun Mavasi bölgəsində yerləşən Qadisiyyə düşərgəsində yerindən edilmiş şəxslərin çadırına edilən hücumda 3 fələstinli, o cümlədən iki qardaş ölüb, 7 nəfər isə yaralanıb.

Bundan əlavə, İsrailin artilleriya birlikləri Xan Yunusun şimal və cənubundakı bir neçə bölgəni atəşə tutub. İsrail hərbi gəmiləri isə Rəfah şəhərinin sahilini top atəşinə tutub.