BAKI, AzerVoice, Nailə Babazadə

İsrailin hücumları və blokadası nəticəsində aclığın hökm sürdüyü Qəzza zolağında son 24 saatda 2-si uşaq olmaqla daha 6 fələstinli aclıqdan həyatını itirib.

AzerVoice xəbər verir ki, Qəzzədəki Səhiyyə Nazirliyinin yaydığı yazılı açıqlamada, aclıq səbəbilə həyatını itirənlərlə bağlı son məlumatlar paylaşılıb. Açıqlamaya görə, son 24 saat ərzində 2-si uşaq olmaqla daha 6 fələstinli aclıq və qidalanma çatışmazlığı səbəbilə vəfat edib.

Bununla da, 7 oktyabr 2023-cü ildən bəri Qəzza zolağında aclıqdan həyatını itirənlərin sayı 140-ı uşaq olmaqla 393-ə yüksəlib.

Birləşmiş Millətlər Təşkilatının (BMT) dəstəklədiyi “İnteqrasiya olunmuş Qida Təhlükəsizliyi Faza Təsnifatı” (IPC) tərəfindən 22 avqustda yayımlanan açıqlamada Qəzzədə rəsmi olaraq aclıq elan edildiyi və bu tarixdən sonra 25-i uşaq olmaqla 115 nəfərin aclıq və qidalanma çatışmazlığı səbəbilə həyatını itirdiyi bildirilib.

IPC həmçinin Qəzzə şəhərində “aclq vəziyyəti” elan edib və bu vəziyyətin sentyabr ayının sonuna qədər Deyr əl-Bələh və Xan Yunis şəhərlərinə də yayıla biləcəyini bildirib.

Qeyd edək ki İsrailin hücumları və humanitar yardımların daxil olmasına maneə yaradan sərt blokadası nəticəsində Qəzza zolağında aclıq geniş yayılıb. Regionda su, dərman, tibbi ləvazimat və gigiyenik vasitələrin çatışmazlığı müşahidə olunur və bu vəziyyət humanitar fəlakətə çevrilib.

Xüsusilə uşaqlar arasında aclıq səbəbilə ölüm halları sürətlə artır. Yerli və beynəlxalq müşahidəçilər İsrailin “aclıq və susuzluğu silah kimi istifadə etdiyini” qeyd edirlər.

Sivil infrastrukturun təxribata uğradıldığı və Qəzzənin 88%-nin dağıdıldığı qeyd olunur. İsrail ordusu, sürgün əmrləri ilə yerindən edilən fələstinliləri mütəmadi olaraq sığındıqları ərazilərdə hədəf alır.

Əhalisi təxminən 2,3 milyon nəfər olan Qəzzə zolağında İsrailin hücumları və köç əmrləri nəticəsində 2 milyona yaxın insan evlərindən didərgin düşüb. Bir çox insan dəfələrlə yer dəyişmək məcburiyyətində qalıb.

Əsas ehtiyaclardan məhrum edilərək yerindən edilən fələstinlilər, yararsız çadırlarda və ya gigiyena şəraitinin son dərəcə pis olduğu, tualetlərin belə kifayət etmədiyi, yoluxucu xəstəliklərin yayıldığı məktəblərdə sağ qalmağa çalışırlar.

İsrail ordusu isə gündəlik hücumlarla bu köçkünlərin sığındıqları çadırları və digər mülki obyektləri bombalayır.

İsrailin 7 oktyabr 2023-cü ildən bu yana Qəzza zolağına həyata keçirdiyi hücumlar nəticəsində indiyədək azı 64 min 368 fələstinli həyatını itirib, 162 min 367 nəfər isə yaralanıb.