BAKI, AzerVoice, Səməd Əyyubov

Livan parlamentinin spikeri Nəbih Bərri siyasi partiyalara müraciət edərək, Hizbullahın silahlı dəstələrinin tərksilahı məsələsini müzakirə etmək üçün ümummilli dialoqun başlanmasını təklif edib.

AzerVoice xəbər verir ki, Bərri bu barədə NBN telekanalı ilə yayımlanan müraciətində danışıb.

“Sakit və konsensus əsaslı dialoq milli təhlükəsizlik strategiyasının hazırlanmasına, həmçinin müqavimət qüvvələrinin əlindəki silahların taleyinin müəyyən edilməsinə imkan yaradacaq” – deyə o bildirib.

Spikerin sözlərinə görə, Hizbullahın silahı “Livanın qürurudur” və ötən il ölkəni İsrail təcavüzündən qorumaqda mühüm rol oynayıb. O vurğulayıb ki, Hizbullahın silahlarının Livan ordusuna təhvil verilməsi xarici təzyiq altında həyata keçirilə bilməz.

Bərri həmçinin qeyd edib ki, Livan hökuməti 2024-cü il noyabrın 27-də imzalanmış atəşkəs sazişinə uyğun bütün öhdəliklərini yerinə yetirib. “İsrail isə əksinə, beş sərhəd rayonunu hələ də nəzarətdə saxlayır, aqressiv fəaliyyətini davam etdirərək livanlıları öldürür və 30-dan çox yaşayış məntəqəsinin sakinlərinin evlərinə qayıtmasına mane olur” – deyə o əlavə edib.

Xatırladaq ki, avqustun 5-də Livan hökuməti ölkədəki bütün silahlı qrupların, o cümlədən Hizbullahın mərhələli şəkildə tərksilahını nəzərdə tutan planı ABŞ və İsrailin tələblərinə uyğun olaraq təsdiqləyib. Sentyabrın 5-də Nazirlər Kabinetində təsdiqlənməsi gözlənilən plana əsasən, Hizbullah raket arsenalının 50 faizini Livan ordusuna təhvil verəcək, bunun müqabilində İsrail işğal altında saxladığı beş sərhəd rayonundan qoşunlarını çıxarmağa başlayacaq.

Lakin Hizbullahın baş katibi şeyx Naim Qasim avqustun 25-də bəyan edib ki, İsrailin hərbi əməliyyatlarını davam etdirdiyi şəraitdə silahların Livan ordusuna təhvil verilməsi mümkün deyil. Onun sözlərinə görə, belə bir addım “milli maraqlara ziddir”.