BAKI, AzerVoice, Nailə Babazadə

Şimali Kipr Türk Cümhuriyyəti Məclisinin sədri Ziya Öztürkler, Livan ilə Cənubi Kipr Rum İdarəsi (GKRY) arasında imzalanan dəniz səlahiyyət zonalarının məhdudlaşdırılması anlaşmasına sərt reaksiya göstərib. O bildirib ki, bu razılaşma Kipr türklərinin hüquqlarını pozur və Rum tərəfinin beynəlxalq alanda imzaladığı heç bir anlaşmanı qəbul etmədiklərini vurğulayıb.

AzerVoice xəbər verir ki, Öztürkler yazılı açıqlamasında qeyd edib ki, anlaşma adadakı siyasi reallıqları nəzərə almayan tək tərəfli addımdır və bölgədə gərginliyi artırır.

“Kipr türklərinin hüquqlarını görməyən heç bir təşəbbüsün dəyəri və keçərliyi yoxdur,” – deyə o bildirib.

O, həmçinin Cənubi Kiprin Avropa İttifaqının neytrallıq prinsipini öz lehinə pozduğunu, adada ədalətli həll imkanlarına zərər verdiyini vurğulayıb: “Rum rəhbərliyinin Ai sədrliyini Brüsseli öz siyasətinə uyğun istiqamətləndirmək üçün istifadə etməsi qəbuledilməzdir.”

Xatırladaq ki, Livan hökuməti 23 oktyabrda GKRY ilə dəniz səlahiyyət zonalarının məhdudlaşdırılması anlaşmasını təsdiqləyib. Sənəd 26 noyabrda Beyrutun Baabda Sarayında Livan Prezidenti Cozef Aun və GKRY lideri Nikos Xristodulidis tərəfindən imzalanıb.