BAKI, AzerVoice, Səməd Əyyubov
Hizbullahın baş katibi Naim Qasım bəyan edib ki, Livan hökuməti ölkənin suverenliyini bərpa etmək üçün plan hazırlamağa məsuldur.
AzerVoice xəbər verir ki, o, hökuməti ictimai etimadın bərpası məqsədilə intensiv müzakirələr aparmağa çağırıb, siyasi partiyaları isə bu planların reallaşdırılmasına dəstək verməyə dəvət edib.
Qasım vurğulayıb ki, hökumət suverenliyin bərpası, ordunun silahlandırılması və milli müdafiə strategiyasının formalaşdırılması istiqamətində addımlar atmalıdır. Onun sözlərinə görə, Livanın əsas problemləri İsrail və ABŞ-ın dəstəyi ilə bağlıdır.
Hizbullah baş katibi qeyd edib ki, “müqavimət” dövlət ordusunun əvəzi deyil, milli ordunun taleyinin bir hissəsidir və ondan imtina etmək mümkün deyil. Əksinə, müqavimət orduya dəstək verir və yardım göstərir. Onun sözlərinə görə, müqavimət yalnız qoruyucu qüvvə kimi deyil, həm də təcavüzə qarşı birbaşa mübarizə aparan faktor kimi çıxış edir.
Qasım əlavə edib ki, ölkənin müdafiəsi üçün ordunun silahlandırılması vacibdir, çünki əsas məsuliyyət məhz ordunun üzərinə düşür, müqavimət isə əlavə dəstək rolunu oynayır və funksiyasını itirməyib.
O xatırladıb ki, müqavimət 2006-cı ildən 2023-cü ilə qədər İsraili çəkindirməyə nail olub və bu, fövqəladə uğurdur. Qasımın sözlərinə görə, “ordu, xalq və müqavimət” üçlüyü sayəsində İsrail 17 il ərzində hücum planlarını reallaşdıra bilməyib.
Hizbullah baş katibi bildirib ki, İsrail işğal və dağıntılar həyata keçirə bilər, lakin müqavimət bu planların qarşısını alacaq və Tel-Əvivin hədəflərinə çatmasına mane olacaq. O, əlavə edib ki, əgər müqavimət mövcud olmasaydı, İsrail Beyruta, Dəməşqə daxil olduğu kimi, asanlıqla girə bilərdi. İsrailin Livanın cənubunda işğal etdiyi beş təpədən kənara keçə bilməməsi də məhz müqavimətin gücündən qaynaqlanır.
Naim Qasım sonda qeyd edib ki, müqavimətin alternativi yalnız təslimiyyət ola bilər. Buna görə də müqavimət İsrailin məqsədlərinə çatmasının qarşısını alan qalxan olaraq qalacaq.
