BAKI, AzerVoice, Fərid Mikayılov
BMT Təhlükəsizlik Şurası bazar ertəsi Livanın cənubunda fəaliyyət göstərən BMT Sülhməramlı Missiyasının (UNIFIL) gələcək taleyi ilə bağlı səsvermə keçirəcək.
AzerVoice xəbər verir ki, ABŞ və İsrailin etirazlarına baxmayaraq, Fransa tərəfindən hazırlanmış layihəyə əsasən, missiyanın fəaliyyəti daha bir il uzadılacaq, eyni zamanda mərhələli şəkildə geri çəkilməyə hazırlıq görüləcək.
Layihə mətnində Şura Livan hökumətinin ölkənin cənubunda yeganə təhlükəsizlik təminatçısı olmasını hədəfləyən geri çəkilmə planının hazırlanmasına işarə edir.
Sənədə əsasən, Livan ordusu son aylarda bölgəyə yerləşdirilərək İran tərəfindən dəstəklənən Hizbullah qruplaşmasının infrastrukturunu sökməyə başlayıb.
Bu proses hökumətin ilin sonuna qədər təşkilatın silahlandırılmasına son qoymaq üçün orduya plan hazırlamaq tapşırığı ilə paralel aparılır. Lakin Hizbullah bu təşəbbüsə qarşı çıxır.
2006-cı ildə İsrail və Hizbullah arasında müharibəni başa çatdıran atəşkəs razılaşmasına əsasən, İsrail Livandan tamamilə çıxmalı idi, lakin Tel-Əviv hələ də strateji əhəmiyyət daşıyan bir sıra bölgələrdə mövcudluğunu saxlayır və Livanın müxtəlif yerlərinə hücumlar təşkil edir.
Qətnaməyə görə, UNIFIL-in mandatı 31 avqust 2026-cı ilədək uzadılacaq. Lakin Vaşinqtonun mətnə necə reaksiya verəcəyi hələ məlum deyil. ABŞ Dövlət Departamenti Şura müzakirələri ilə bağlı şərh verməkdən imtina edib.
Mətn həmçinin İsrailin UNIFIL mövqelərinə endirdiyi zərbələr nəticəsində bir neçə sülhməramlının yaralanması və obyektlərin zədələnməsini “pisləyən” ifadələr də ehtiva edir.
Səsvermə öncəsi BMT rəsmisi xəbərdarlıq edərək bildirib ki, missiyanın tamamilə və ya sürətlə aradan qaldırılması bölgədə heç kimə fayda verməyəcək və yüksək risk yaradacaq. Onun sözlərinə görə, UNIFIL bu günə qədər 8 300 Livan əsgərinin 120 məntəqəyə yerləşdirilməsinə dəstək verib, logistika, maliyyə, yanacaq və təlimlərlə təmin edib.
