BAKI,AzerVoice Analitik Təhlil Mərkəzi
İsrailin Baş naziri Benyamin Netanyahunun ofisi bu gün, bazar ertəsi yaydığı bəyanatda bildirib ki, İsrail Livanı Hizbullah qruplaşmasının silahsızlaşdırılmasında dəstəkləməyə hazırdır.
Netanyahunun ofisinin açıqlamasında qeyd olunub: “İsrail və Livanın əməkdaşlıq ruhunda irəliləməsinin və ortaq məqsədə – Hizbullahın silahsızlaşdırılmasına yönəlməsinin vaxtıdır, – deyə “Reuters” xəbər agentliyi məlumat yayıb.
Xatırladaq ki, Livan Nazirlər Kabineti bu ayın əvvəlində İranla müttəfiq olan Hizbullah qruplaşmasının silahsızlaşdırılması üçün ABŞ tərəfindən hazırlanmış planın məqsədlərini təsdiqləmişdi.
Netanyahunun ofisi əlavə edib: “Əgər Livan Silahlı Qüvvələri Hizbullahı silahsızlaşdırmaq üçün lazımi addımlar atarsa, İsrail də qarşılıqlı tədbirlər görəcək. Buraya ABŞ-ın rəhbərlik etdiyi təhlükəsizlik mexanizmi ilə koordinasiyalı şəkildə İsrail hərbi varlığının mərhələli şəkildə azaldılması da daxildir”.
“Hizbullah” və “Əməl” hərəkatı etiraz çağırışı etdi
Digər tərəfdən, Livanın “Əməl” hərəkatının Mərkəzi Fəhlə Bürosu və Hizbullahın Mərkəzi Həmkarlar və Fəhlələr Birliyi bu gün birgə bəyanat yayaraq çərşənbə günü günortadan sonra Beyrut mərkəzində hökumətin silahı yalnız dövlətin əlində toplamaq qərarına qarşı etiraz aksiyası keçirməyə çağırıblar.
Bəyanatda hər iki təşkilat hökumətin qərarlarını milli mənafelərə zidd adlandırıb və əlavə ediblər: “Vətənimizin üzləşdiyi çətinliklərə qarşı səbrimiz tükənib, mövqeyimizi milli həmrəyliklə ifadə etməyin vaxtı çatıb”.
“Əməl” və Hizbullahın bəyanatında vurğulanıb ki, bu etiraz aksiyası “düşmənin gücünü sındırmaq qabiliyyətini sübut etmiş silahımızı qorumaq haqqımızın və torpağımızı işğal edən İsrail düşməninə qarşı müqavimət haqqımızın təsdiqi” olacaq.
Silahların dövlətin əlində cəmlənməsi qərarı
Livan hökuməti ayın əvvəlində qərar verib ki, ilin sonuna qədər silahların yalnız dövlətin əlində saxlanması təmin olunacaq və bu vəzifə ordunun üzərinə qoyulub.
Hizbullah üzərinə təzyiqlər isə ötən il İsraillə müharibədə ağır zərbə alaraq gücləndi. Həmin müharibədə təşkilatın bir çox yüksək rütbəli komandirləri, o cümlədən baş katib Həsən Nəsrullah öldürülmüş, daha sonra noyabr ayında ABŞ vasitəçiliyi ilə atəşkəs əldə olunmuşdu.
Atəşkəs razılaşmasına görə, Livanda yalnız altı dövlət təhlükəsizlik qurumu silah saxlaya bilər, hökumət isə qeyri-dövlət silahlı qruplarının yenidən silahlanmasının qarşısını almağı öhdəsinə götürmüşdü.
Buna baxmayaraq, atəşkəsdən sonra da İsrail cənub və şərqi Livanda Hizbullaha məxsus silah anbarları və döyüşçülərinə qarşı hücumlar həyata keçirməyə davam edib.