BAKI, AzerVoice, Zeynəb Raminqızı

Fələstin Qeyri-Hökumət Təşkilatları Şəbəkəsi BMT Təhlükəsizlik Şurasını fələstinlilərə beynəlxalq qoruma təmin etməyə çağırıb. Çağırış, İsrailin Qəzzada mülki əhaliyə qarşı davam edən hücumları, mülki qurumların hədəfə alınması və BMT-nin bölgədə aclığın baş verdiyini rəsmən elan etməsi fonunda edilib.

BMT-nin beynəlxalq qida təhlükəsizliyi təsnifatına görə, hazırda Qəzza zolağında azı yarım milyon insan “beşinci mərhələ” olaraq adlandırılan fəlakətli şəraitdə yaşayır. Bu mərhələ kəskin aclıq, ölüm halları və kritik səviyyədə qidalanma çatışmazlığı ilə xarakterizə olunur. BMT-nin proqnozlarına görə, vəziyyət sentyabrın sonuna qədər Deyr əl-Bəlah və Xan Yunis vilayətlərində daha da ağırlaşacaq.

QHT şəbəkəsi, İsrailin Qəzzada həyata keçirdiyi soyqırım nəticəsində indiyədək 62 mindən çox insanın öldüyünü, 157 mindən artıq insanın isə yaralandığını bildirib. Bundan əlavə, İsrail hökumətinin 3400 yeni yaşayış vahidini nəzərdə tutan “E1 planı”nın icrasına başlamağa razılıq verməsi və məskunlaşanların vətəndaşlara qarşı artan zorakılıqları diqqətə çatdırılıb.

Xüsusilə bu gün İsrailin jurnalistlər, tibb işçiləri və xəstəxanaları hədəfə alması nəticəsində 20 nəfərin, o cümlədən 6 jurnalist və bir tibb işçisinin həlak olduğu qeyd olunub. QHT şəbəkəsi bunu beynəlxalq hüququn açıq şəkildə pozulması və beynəlxalq ictimaiyyətin mülki şəxsləri qorumaqda aciz qalmasının göstəricisi kimi qiymətləndirib.

Fələstin QHT-ləri Təhlükəsizlik Şurasından Qəzza və İordan çayının Qərb sahilində mülki əhalinin qorunması üçün BMT qüvvələrinin yerləşdirilməsini tələb edib. Əgər Təhlükəsizlik Şurası bu addımı atmasa, Fələstin dövlətinin BMT Baş Assambleyasına müraciət edərək aşağıdakı tələbləri irəli sürməsi çağırılıb:

Qəzza zolağında atəşkəsin elan olunması, mühasirənin ləğvi və sərhəd-keçid məntəqələrinin açılması;

Fələstinlilərin qorunması üçün BMT qüvvələrinin bölgəyə yerləşdirilməsi;

İsrailin dəstəklədiyi məskunlaşma siyasəti və hücumların qarşısının alınması;

İsrailə qarşı sanksiyaların tətbiqi və onun BMT-də üzvlüyünün dondurulması.