BAKI, AzerVoice, Səməd Əyyubov
Zəngəzur Dəhlizi layihəsinin bütün komponentləri ilə həyata keçirilməsi Türkiyə, Azərbaycan və Ermənistan arasında iqtisadi əməkdaşlığı yeni mərhələyə çıxaracaq.
AzerVoice xəbər verir ki, bunu Türkiyə prezidenti Rəcəb Tayyib Ərdoğan bəyan edib.
“22 avqust, cümə günü ölkəmizlə birlikdə Cənubi Qafqaz üçün strateji əhəmiyyət daşıyan bir layihənin təməlini qoyduq. Zəngəzur Dəhlizinin qapısını açacaq Qars–İğdır–Aralıq–Dilucu dəmir yolu xəttinin inşasına başlamağın qürurunu yaşadıq. Bildiyiniz kimi, Zəngəzur Dəhlizi bütün bölgəmiz üçün sülh layihəsidir. Onun tam şəkildə həyata keçirilməsi Türkiyə, Azərbaycan və Ermənistan arasında iqtisadi əməkdaşlığa yeni bir mərhələ qazandıracaq” – deyə, Ərdoğan vurğulayıb.
Prezident qeyd edib ki, layihənin əsasını təşkil edən 224 kilometrlik Qars–İğdır–Aralıq–Dilucu dəmir yolu iki xəttli, elektrikləşdirilmiş və siqnalla idarə olunan formada inşa olunacaq:
“Bu xətt vasitəsilə ildə 5,5 milyon sərnişin və 15 milyon ton yük daşınacaq. Ümumi dəyəri 2,4 milyard avro olan layihə istifadəyə verildikdən sonra Çindən İngiltərəyə uzanan beynəlxalq ticarət marşrutu daha səmərəli olacaq. Layihə həmçinin Xəzər və Aralıq dənizlərini birləşdirərək Şərq və Cənub-Şərqi Anadolunun istehsal gücünə, ixracına və nəqliyyat infrastrukturunun inkişafına mühüm töhfə verəcək.”
“Həm ölkəmiz, həm də bölgəmiz üçün böyük əhəmiyyət daşıyan Qars–İğdır–Aralıq–Dilucu dəmir yolu xəttinin xeyirli və uğurlu olmasını arzulayıram” - deyə, Ərdoğan yekunlaşdırıb.
