BAKI, AzerVoice, Səməd Əyyubov

İsrail hökuməti Qəzza zolağında insanlığa aid bütün dəyərləri məhv edir.

AzerVoice xəbər verir ki, bu sözləri Türkiyə prezidenti Rəcəb Tayyib Ərdoğan səsləndirib.

“İsrailin bu gün Qəzzadakı xəstəxanaya təşkil etdiyi hücum nəticəsində beşi jurnalist olmaqla azı iyirmi fələstinli həlak olub. Baş nazir Netanyahunun rəhbərlik etdiyi hökumət insanlığa aid bütün dəyərləri məhv etmək üçün amansız hücumlarını fasiləsiz davam etdirir” – deyə, o vurğulayıb.

Ərdoğan, həmçinin Nazirlər Kabinetinin Ahlat şəhərində baş tutan iclasında Qəzza ilə bağlı atılacaq addımların müzakirə olunduğunu qeyd edib.

“Qarşıdakı dövrdə ölkəmizin Qəzzadakı qətliamı dayandırmaq, bölgə əhalisinə daha çox yardım çatdırmaq və beynəlxalq ictimaiyyəti hərəkətə keçirmək məqsədilə atacağı əlavə addımları dəyərləndirdik” – deyə, o bildirib.

Qeyd edək ki, “Əl Cəzirə” telekanalının məlumatına görə, İsrail ordusunun Xan Yunisdə yerləşən Naser xəstəxanasına hücumu nəticəsində ölənlərin sayı 20-yə çatıb. Onların arasında beş jurnalist və dörd tibb işçisi var.

İsrail Müdafiə Ordusunun Baş Qərargah rəisi Eyal Zamir hadisə ilə bağlı ilkin istintaqın aparılmasına dair göstəriş verib.