BAKI, Azervoice, Nərmin Ağayeva

İsrail hökumətinin Qəzza zolağını tam işğal etmək qərarından sonra bölgədə yaşayan dinc sakinlərdən sərt reaksiya gəlib.

Azervoice xəbər verir ki, Qətərdə fəaliyyət göstərən Əl-Cəzirə xəbər kanalına danışan Qəzzalılar, artıq “işğal üçün yer qalmadığını” bildirərək, yaşadıqları ağır şəraitə diqqət çəkiblər.

“İşğal etməyə yer qalmayıb. Onsuz da hər gün 100-150 insan həyatını itirir. Qəzzanın demək olar ki, hamısı qərb hissəsi ilə məhdudlaşıb. Xalq üçün işğalın olub-olmaması artıq fərq etmir.” - deyə Qəzzanın şərqində yaşayan Mahmud əl-Quraşli vəziyyəti belə ifadə edib.

Digər fələstinli, Şücaiyyə məhəlləsindən didərgin düşmüş Raed Abu Mohammed isə İsrailin qərarını “şok edici” adlandıraraq, “Onsuz da havadan, qurudan və dənizdən işğal altındayıq. Beş aydır çadırlarda yaşayırıq. Ağrı və ölüm var, amma biz hələ də yaşamağa davam edirik” - deyə bildirib.

Qeyd edək ki, İsrail Təhlükəsizlik Kabineti Qəzza şəhərinin işğalını təsdiqləyib və ordunun hazırlıqlarına başladığı bildirilir. Bu qərara Türkiyə də daxil olmaqla bir çox ölkələr sərt etirazlarını bildirib.