BAKI, AzerVoice, Zeynəb Raminqızı

HƏMAS, Qəzza zolağında ağırlaşan humanitar böhran və aclıq məsələsi həll olunmadan İsraillə atəşkəs danışıqlarına qayıtmayacağını bildirib.

AzerVoice xəbər verir ki, İsrailin Qəzza zolağında aylardır davam edən hərbi hücumları nəticəsində bölgədə vəziyyət daha da gərginləşir.

HƏMAS yazılı açıqlamasında “Qəzzada ehtiyacı olanlara yardım çatdırılarsa və dərinləşən humanitar böhran, aclıq aradan qalxarsa, dərhal atəşkəs danışıqlarına qoşulmağa hazırıq”. Hərəkat əlavə edib ki, aclıq və qıtlıq şəraitində danışıqlar aparmağın mənası yoxdur."- deyə qeyd edib.

Bəyanatda beynəlxalq ictimaiyyət və əlaqədar tərəflər İsrailin Qəzzada həyata keçirdiyi hücumları dayandırmağa çağırılıb. HƏMAS xüsusilə ərzaq yardımlarının bölgəyə təxirəsalınmadan, məhdudiyyətsiz və təhlükəsiz şəkildə çatdırılmasının vacibliyini vurğulayıb.

Digər tərəfdən, ABŞ və İsrailin Qətərdəki nümayəndə heyətlərinin iyulun 24-də məsləhətləşmələr üçün ölkələrinə döndüyü qeyd olunur. HƏMAS-ın Qəzza lideri Xəlil əl-Həyya isə atəşkəs danışıqlarında müəyyən irəliləyiş əldə olunduğunu bildirərək, “Vasitəçilərin təkliflərinin çoxunu qəbul etdik. İsrailin neqativ cavabları bizi təəccübləndirdi,” deyə vurğulayıb.