BAKI, AzerVoice, Nailə Babazadə

NATO Baş katibinin müavini Radmila Şekerinska bildirib ki, bütün kəşfiyyat hesabatları və siyasi təhlillər müharibə başa çatdıqdan sonra Rusiyanın daha da təhlükəli hala gələcəyini göstərir.

AzerVoice xəbər verir ki, Şekerinska Almaniyada keçirilən 62-ci Münhen Təhlükəsizlik Konfransında “Avropalılar, birləşin. Daha çətin dünyada yenidən söz sahibi olmaq” adlı paneldə çıxış edib.

O qeyd edib ki, Rusiyanın hərbi istehsalına və strukturuna nəzər saldıqda, ölkənin xarici siyasətinin genişlənmə yönümlü olduğu barədə ümumi qənaət formalaşır. Bu səbəbdən müttəfiqlərin müdafiə və hərbi istehsala yatırımlarının prioritet olaraq qalacağını vurğulayıb.

Şekerinska əlavə edib ki, qlobal təhlükəsizlik mühiti heç vaxt indiki qədər mürəkkəb, gərgin və çətin olmayıb. Bu şəraitdə mövcud problemlərlə mübarizə aparmaq üçün bütün imkanların bir araya gətirilməsi zəruridir.

O, iyul ayında keçiriləcək Ankara Zirvəsində müttəfiqlərin daha çox istehsal etməsinin vacibliyinin və bunun üçün daha səmərəli hüquqi mexanizmlərə ehtiyacın müzakirə olunacağını bildirib. Müdafiə sənayesi məhsullarının satış və tədarük proseslərinin daha sürətli həyata keçirilməsinin vacibliyini qeyd edib.

Şekerinska xüsusilə Ukrayna üçün təcili ehtiyac olan hava hücumundan müdafiə sistemləri kimi əsas imkanlara diqqət çəkərək, Atlantikin hər iki tərəfində kifayət qədər istehsal gücünün olmadığını vurğulayıb. Onun sözlərinə görə, müdafiə istehsalının sürətlə artırılması təxirəsalınmaz məsələdir.

Müdafiə sənayesi sahəsində yatırımlardan danışan Şekerinska ABŞ, Kanada və Avropa müttəfiqləri ilə yanaşı Türkiyə, Böyük Britaniya və Norveçin də bu sahədə mühüm rol oynadığını bildirib. O vurğulayıb ki, bütün bu səylər NATO-nun və onun Avropa qolunun gücləndirilməsinə yönəlib və zərurət yarandıqda nəticə əldə etmək üçün İttifaqın güclü tərəflərinə ehtiyac var.