BAKI, AzerVoice

İsrailin mühasirəsi və yardım blokadası nəticəsində Qəzza zolağında aclıqdan ölənlərin sayı artır.

AzerVoice xəbər verir ki, bu barədə Qəzza Səhiyyə Nazirliyi yazılı açıqlama verib. Son 24 saatda biri uşaq olmaqla 7 fələstinli aclıq və qida çatışmazlığı səbəbilə həyatını itirib.

Nazirlik bildirir ki, 2023-cü il oktyabrın 7-dən bu yana aclıqdan ölənlərin ümumi sayı 154 nəfərə, onlardan 89-u uşaq olmaqla yüksəlib.

Humanitar təşkilatlar Qəzzada su, qida, dərman və tibbi ləvazimat çatışmazlığının kritik həddə çatdığını, xüsusilə uşaqlar arasında qida çatışmazlığı səbəbilə ölüm hallarının sürətlə artdığını bildirirlər.

Yerli və beynəlxalq təşkilatlar, eləcə də bəzi siyasətçilər İsrailin “aclıq və susuzluğu silah kimi istifadə etməsini” kəskin tənqid edirlər. Mühasirə ilə yanaşı mülki infrastruktura qarşı hücumlar, məcburi deportasiyalar, çadırların və məktəblərin bombalanması bölgədəki fələstinliləri yaşamaq üçün minimal imkanlardan da məhrum edir.

Təxminən 2,3 milyon əhalisi olan Qəzzada 2 milyona yaxın insan bir neçə dəfə yerindən didərgin düşüb və gigiyenik şəraitin olmadığı müvəqqəti sığınacaqlarda sağ qalmağa çalışır.