BAKI, AzerVoice
İsrail İranın şərqində yerləşən Yəzd vilayətinə hərbi hava zərbələri endirib.
AzerVoice xəbər verir ki, bu barədə İran KİV məlumat yayıb.
Məlumata əsasən, zərbələr nəticəsində İran Silahlı Qüvvələrinin elit birləşməsi sayılan İslam İnqilabı Keşikçiləri Korpusunun (SEPAH) yeddi hərbçisi həlak olub.
Bildirilib ki, SEPAH üzvləri ilə yanaşı, iki hərbi çağırışçının da öldüyü bildirilib. Hadisənin detalları açıqlanmayıb.
Xatırladaq ki, İsrail Hərbi Hava Qüvvələri iyunun 13-də İran ərazisinə hava zərbələri endiriblər. Zərbələr nəticəsində çoxlu sayda yüksək səviyyəli hərbçi, o cümlədən İran Silahlı Qüvvələri Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər ölüb. İran BMT Təhlükəsizlik Şurasının hadisə ilə əlaqədar fövqəladə iclas keçirməsini istəyib.
Bu hücumlara cavab olaraq isə İran Ordusu İsrailə qarşı "Həqiqi vəd III" adlı əməliyyat keçirib. Təl-Əviv, Qüds və digər bölgələrə yüzlərlə ballistik raket buraxılıb.
