AzerVoice Analitik Təhlil Mərkəzi – İraqın tanınmış şiə lideri, Sədr hərəkatının rəhbəri Müqtəda Sədr növbəti parlament seçkilərinə qatılmaqdan imtina etdiyini bir daha açıq şəkildə bəyan edib. Bu açıqlama, onun adının dolayısıyla istifadə olunaraq seçkilərdə iştirak planlarını təkzib edən aydın mesaj kimi dəyərləndirilib. Eyni zamanda bu bəyanat İranın koalisiyalar arasında vasitəçilik cəhdlərinə də dolaylı cavab hesab olunur.
Sədr bu sözləri atası Məhəmməd Məhəmməd Sadiq əs-Sədrin və iki qardaşının qətlə yetirilməsinin ildönümü mərasimində səsləndirib. O, çıxışında bildirib ki, hər hansı formada seçkiyə qatılmaq "günaha yardım" sayılır və bu prosesi legitim hesab etmir.
“Susmağımız özü danışmaq deməkdir..Bu gün danışan zalimlərin və fəsad əhlinin ürəkləri əlimizdədir” – deyə Sədr vurğulayıb.
O, tərəfdarlarını "qeyri-rəsmi və ya saxta siyahılar" ardınca getməməyə çağıraraq, bəzi şəxslərin onun adından danışmağa çalışdıqlarına və bunu rədd etdiyinə diqqət çəkib.
İran təzyiqləri və "əvəzedici siyahılar" iddiaları
Sədrin bu sərt çıxışı, son aylarda dövriyyədə olan və bəzi tərəfdarlarının onun adını daşımadan seçkilərə qeyri-rəsmi siyahılarla qatılmaq niyyətində olduqlarına dair xəbərlərə cavab kimi dəyərləndirilib. Bu iddialar, Sədrin daha əvvəl tərəfdarlarını seçki məlumatlarını yeniləməyə çağırması ilə əsaslandırılırdı.
Lakin Müqtəda Sədr bu ehtimallara son qoyaraq bildirib:
“Fəsad mövcud olduqca, hər hansı qüsurlu və yalnız məzhəbi-partiya maraqlarına xidmət edən seçkilərə qatılmayacağam.”
Sədr aydın şəkildə bəyan edib ki, onun açıq mövqeyindən kənarda atılan hər bir seçki təşəbbüsü "qəbuledilməz manipulyasiya" sayılacaq.
"Nə namizədlik, nə səsvermə": tərəfdarlara sərt xəbərdarlıq
Sədr çıxışında tərəfdarlarına da müraciət edib:“Daha əvvəl onlara səs verməyi əmr etmişdimsə, bu gün onlara həm səs verməyi, həm də namizəd olmağı qadağan edirəm.”
Bu açıqlama, onun nə adının, nə də kütləvi bazasının rəsmi və ya qeyri-rəsmi şəkildə siyasi sistemdə təmsil olunmasına razı olmadığını təsdiqləyir.
İranın koordinasiya çərçivəsinə təzyiqi və Sədrin cavabı
Sədrin bu sərt bəyanatı, İranın son vaxtlar koordinasiya çərçivəsindəki şiə qüvvələrinə təzyiq göstərərək Sədr hərəkatı ilə yaxınlaşmanı təşviq etməyə çalışması fonunda səsləndirilib. İddialara görə, Tehran Sədrin qayıdışını seçkilərə xalq dəstəyini artırmaq üçün fürsət kimi görür.
Adının açıqlanmasını istəməyən siyasi mənbə bildirib:
“İran 2024-cü ilin əvvəlindən bəri koordinasiya çərçivəsinin nüfuzunun azalmasından və seçkiyə marağın azalacağından narahatdır. Sədrin qayıdışı ilə bu boşluğun dolacağını düşünürdülər.”
Lakin Müqtəda Sədrin son bəyanatı bu planların qarşısını almış olur.
2018-dən sonra qırılan körpülər və davam edən təcrid siyasəti
Xatırladaq ki, Müqtəda Sədr 2022-ci ilin iyun ayında siyasi proseslərdən çəkilmişdi. Həmin vaxt onun 73 millət vəkili parlamentdən istefa vermiş, bu da ölkədə siyasi tarazlığı ciddi şəkildə dəyişmişdi. O vaxtdan bəri Sədr sistem xaricində qalmağa üstünlük verir və korrupsioner adlandırdığı qüvvələrlə hər hansı tərəfdaşlığı rədd edir.
Seçkilərin gələcəyi və legitimlik sualları
Sədrin tərəfdarlarının geniş şəkildə səsverməni boykot etməsi seçki iştirakına ciddi təsir edə bilər. Bu isə yeni parlamentin legitimliyinə kölgə sala bilər, xüsusilə də əgər koordinasiya çərçivəsinin namizədləri Sədr hərəkatı olmadan üstünlük əldə etsələr.
Sədrin imtinası sadəcə siyasi mövqe deyil
Müqtəda Sədrin seçkilərə qatılmamaq qərarını bir daha vurğulaması təkcə siyasi bəyanat deyil, həm də daxili və xarici güclərə açıq mesajdır. O, sadiq kütləsinin səsini nə alver mövzusu, nə də vasitə kimi qəbul etmir. Sədr hərəkatı bu mövqeyi ilə bir daha göstərdi ki, xalq dəstəyi korrupsiyaya bulaşmış siyasi sistemdə deyil, təmiz mənəvi və sosial yolla ifadə olunmalıdır.
