BAKI, AzerVoice, Nailə Babazadə

İsrail qüvvələri Qəzzadaki atəşkəs razılaşmasının birinci mərhələsi çərçivəsində, aralarında ömürlük həbs cəzası alanların da olduğu 83 fələstinli məhbusu azad edib.

Fələstinin rəsmi WAFA agentliyinin xəbərinə görə, İsrail Qəzzada atəşkəs və girov mübadiləsi razılaşması çərçivəsində işğal altındakı İordan çayının qərb sahilində, Ramallah yaxınlığında yerləşən Ofer Həbsxanasından fələstinli məhbusları azad edib.

Xəbərdə bildirilib ki, atəşkəs razılaşmasının birinci mərhələsi çərçivəsində ömürlük həbs cəzasına məhkum edilən 83 fələstinli azad olunub.

WAFA az sonra məlumatı yeniləyərək azad edilənlərin sayının 88 nəfər olduğunu açıqlayıb.

HƏMAS Qəzzada atəşkəs və girov mübadiləsi razılaşması çərçivəsində 20 israilli girovu Beynəlxalq Qızıl Xaç Komitəsinin (ICRC) nümayəndələrinə təhvil verərək bütün sağ israilli girovları azad etmişdi.

Fələstin Məhbuslar Media Ofisi də İsrailin atəşkəs çərçivəsində azad edəcəyi ömürlük həbsə məhkum edilmiş 250 fələstinli ilə 2023-cü ilin oktyabrından bəri Qəzzədən saxladığı 1718 nəfərin siyahısını dərc etmişdi.

Qeyd edək ki, ABŞ Prezidenti Donald Tramp 9 oktyabrda Misirdə davam edən danışıqlarda İsraillə HƏMAS-ın Qəzzada atəşkəs planının ilk mərhələsini təsdiqlədiyini elan etmişdi.

Müzakirələrin aparıldığı Misirdə razılaşma imzalanarkən, İsrail hökumətinin təsdiqindən sonra 10 oktyabrın ilk saatlarında razılaşma qüvvəyə minib.

Razılaşmada nəzərdə tutulduğu kimi, İsrail ordusunun “sarı xətt” adlanan mövqelərə çəkilməsindən sonra Qəzza zolağında atəşkəsin həmin gün saat 12:00-da qüvvəyə mindiyi açıqlanıb.

İsrailin Qəzza zolağına 8 oktyabr 2023-dən atəşkəs razılaşmasına qədər keçirdiyi hücumlar nəticəsində 67 min 682 nəfər həlak olub, 170 min 33 nəfər yaralanıb.