BAKI, AzerVoice, Fərid Mikayılov

Türkiyənin paytaxtı Ankara bu gün paytaxt elan edilməsinin 102-ci ildönümünü qeyd edir.

AzerVoice xəbər verir ki, 13 oktyabr 1923-cü ildə qəbul edilən qərarla Ankara, yeni yaranan Türkiyə Cümhuriyyətinin siyasi və inzibati mərkəzi elan olunmuşdu.

İsmət İnönü və onunla birlikdə hərəkət edən 14 millət vəkili həmin il Böyük Millət Məclisinə qanun layihəsi təqdim etmiş, təklif səs çoxluğu ilə qəbul edilərək Ankara rəsmi şəkildə Türkiyənin paytaxtı olmuşdu.

Ankara, İstiqlal müharibəsi dövründə Anadolu torpaqlarında yerləşən kiçik bir şəhərdən, müasir Türkiyənin siyasi, iqtisadi və mədəni mərkəzinə çevrilib. Mustafa Kamal Atatürkün rəhbərliyi ilə şəhər milli mübarizənin qərargahına çevrilərək, sonralar “Cümhuriyyətin ürəyi” kimi simvolik məna qazanıb.

Türkiyənin müxtəlif bölgələrində keçirilən tədbirlərdə və sosial media platformalarında Ankaranın paytaxt elan edilməsinin ildönümü geniş qeyd edilir. Rəsmi şəxslər və ictimai xadimlər tərəfindən yayılan təbriklərdə Ankara “milli iradənin simvolu”, “azadlıq və müasirliyin paytaxtı” kimi qiymətləndirilir.

Ankaranın paytaxt elan edilməsi qərarı təkcə coğrafi yox, həm də siyasi və tarixi baxımdan mühüm dönüş nöqtəsi idi. Bu addım Osmanlı dövrünün mərkəzləşmiş idarəçilik sistemindən imtina edərək, müasir Türkiyə dövlətinin təməlini qoydu.

Bu gün Ankara həm tarixi mirasın daşıyıcısı, həm də Cümhuriyyət dəyərlərinin qoruyucusu kimi Türkiyənin gələcəyinə istiqamət verən şəhər hesab olunur.