BAKI, AzerVoice

İran və Livan mediası, Hizbullahın keçmiş baş katibi Həsən Nəsrullahın uzunillik şəxsi mühafizəçisi Hüseyn Xəlilin və onun oğlunun İsrailin İranda həyata keçirdiyi hava zərbəsi nəticəsində öldürüldüyünü təsdiqləyib. AzerVoice xəəbər verir ki, Livanda Hizbullaha yaxın mənbələrin yaydığı məlumata görə, “Əbu Əli Xəlil” ləqəbi ilə tanınan Hüseyn Xəlil, oğlu Mehdi və İrana meyilli iraqlı “Seyyidüş-Şühəda Briqadası”nın komandanı Heydər Musəvi İsrailin İran-İraq sərhədinə yaxın əraziyə endirdiyi hava zərbəsi nəticəsində həlak olublar. Onların zərbə zamanı İran ərazisinə daxil olmaq üzrə olduqları bildirilir.

Ziyarət, yoxsa gizli missiya?

Xəlilin bölgədə olmasının səbəbləri rəsmi olaraq açıqlanmasa da, Hizbullaha yaxın media orqanları onun Aşura münasibətilə dini ziyarət üçün əvvəlcə İraqda, daha sonra isə İranda olduğu versiyasını irəli sürüb.

Qeyd edək ki, 1980-ci illərdən Hizbullaha qoşulan Hüseyn Xəlil, uzun illər boyunca Həsən Nəsrullahın ən yaxın adamlarından biri olub və təşkilat daxilində “Seyidin qalxanı” kimi tanınıb. O, 2023-cü ilin 27 sentyabrında Beyrutun cənub bölgəsində Nəsrullahın və onun hərbi komandirlərindən biri olan Ali Kərkinin həlak olduğu İsrail hücumundan sağ çıxmışdı.

Nəsrullahın dəfn mərasimində Xəlilin üç gün ərzində onun nəşi başında keşik çəkdiyi və dəfnə qədər onu müşayiət etdiyi də xəbərlərdə yer almışdı. 2024-cü ilin fevralında isə Həsən Nəsrullahın cənazəsinin daimi məzarlığa köçürülməsi zamanı Xəlil yenidən ön planda görünmüşdü.

Son aylar ərzində o, Nəsrullahın Beyrut hava limanı yolu üzərində yerləşən məqbərəsinin təhlükəsizliyinə cavabdeh şəxs kimi fəaliyyət göstərirdi. Onun ölümü, Hizbullahın daxilində ciddi bir təhlükəsizlik boşluğu yaradacağı ehtimal edilir.

İsrailin İrana qarşı hava əməliyyatları artıq yalnız nüvə obyektlərini deyil, İranla ittifaqda olan əsas simaları da hədəfə alır. Hüseyn Xəlilin öldürülməsi, Tehrana verilən açıq mesajdır: İsrail üçün "müqavimət oxu"nun əsas fiqurlarına belə təhlükəsizlik zəmanəti yoxdur.