BAKI,AzerVoice, Nailə Babazadə

Livanın baş naziri Navaf Salam çərşənbə axşamı verdiyi açıqlamada ölkəsinin yeni bir münaqişəyə cəlb olunmasına imkan verməyəcəyini bildirib. Bu bəyanat Hizbullah qruplaşmasının "İrana qarşı hər hansı hücum bizə qarşı hücumdur" xəbərdarlığından sonra səsləndirilib.

AzerVoice xəbər verir ki, Dubayda keçirilən Dünya Hökumətlər Sammitində çıxış edən Navaf Salam Hizbullah lideri Şeyx Naim Qasemin ötən həftəki şərhləri ilə bağlı sualı cavablandırıb. Baş nazir kəskin şəkildə vurğulayıb ki, hökumət heç kimin ölkəni yeni bir "macəraya" sürükləməsinə əsla icazə verməyəcək.

Xatırladaq ki, Naim Qasem ABŞ-ın İrana qarşı hərbi əməliyyat təhdidlərinə cavab olaraq Hizbullahın həmin vaxt necə hərəkət edəcəyini özünün seçəcəyini, lakin bu məsələdə neytral qalmayacaqlarını bildirmişdi.

Baş nazir Salam isə Hizbullahın Həmasa dəstək məqsədilə Qəzza müharibəsinə daxil olmaq qərarının Livan üçün "çox ağır" nəticələr doğurduğunu qeyd edib. O əlavə edib ki, hazırda ölkəni bu növ təhlükəli risklərə məruz qoymaq istəyən heç bir tərəf yoxdur.