BAKI,AzerVoice, Fərid Mikayılov

İranda hökumət əleyhinə etirazların davam etdiyi bir vaxtda Liviyanın devrilmiş lideri Müəmmər Qəddafinin qızı Ayşə Qəddafinin illər əvvəl İran xalqına ünvanladığı xəbərdarlıq yenidən gündəmə gəlib.

AzerVoice xəbər verir ki, Ayşə Qəddafi həmin müraciətində İranın qarşılaşdığı geosiyasi təzyiqləri Liviyanın 2011-ci ildə yaşadığı proseslə müqayisə edərək, Qərb dövlətlərinin vədlərinə etibar etməməyə çağırmışdı.

Onun sözlərinə görə, atasının nüvə və raket proqramlarından imtina etməsi Liviyanı qorumaq əvəzinə ölkəni xarici hərbi müdaxiləyə açıq hala gətirib.

Qəddafi sosial şəbəkələrdə yayılmış müraciətində “acı, dağıntı və xəyanəti şəxsən yaşamış biri kimi” danışdığını vurğulayaraq bildirib ki, Qərbin diplomatik vədləri Liviyada fəlakətlə nəticələnib. O qeyd edib ki, məhz bu silahlar ölkəni NATO bombardmanından çəkindirə biləcək əsas amillər idi.

Ayşə Qəddafi bildirib ki, “öncə müdafiəsiz hala saldılar, sonra hücum etdilər” – bu, Liviyanın acı təcrübəsidir. Onun sözlərinə görə, silahsızlanma və güzəşt siyasəti ölkəni qorumaq əvəzinə onu parçalanmaya və xaosa sürükləyib.

Yaxın Şərqdə artan gərginlik, İsrailin Həsən Nəsrallah və İsmayıl Haniyəyə qarşı hücumlarından sonra bölgənin açıq münaqişə mərhələsinə daxil olduğu bir vaxtda, Ayşə Qəddafinin bu mesajı tarixi xəbərdarlıq kimi qiymətləndirilir.

Sonda o vurğulayıb ki, müdafiə qabiliyyətinə sahib olmaq aqressiya deyil, milli varlığın qorunması məsələsidir və yanlış vədlərə inanmaq dövlətlərin məhvinə aparan yoldur.