BAKI,AzerVoice, Nailə Babazadə
Fransa martın 5-də Prezident Emmanuel Makronun sədrliyi ilə Livan Silahlı Qüvvələrinə dəstək məqsədilə keçiriləcək beynəlxalq konfransın uğuruna ümid edir.
AzerVoice xəbər verir ki, Fransız rəsmilərinin gözləntilərinə görə, görüşdə 50-yə yaxın ölkənin və 10-dan çox beynəlxalq və regional təşkilatın nümayəndəsi iştirak edəcək. Bu geniş tərkib beynəlxalq birliyin Livan ordusunun gücləndirilməsinə verdiyi əhəmiyyətin göstəricisi hesab olunur.
Konfrans Livanın ölkə daxilində bütün silahların dövlət nəzarətinə verilməsi planının ikinci mərhələsi ilə eyni vaxta təsadüf edir. Hazırlıqları davam edən bu plan Litani çayının şimalından başlayaraq Avali çayına qədər olan əraziləri əhatə edəcək. Paris konfransın ya Ər-Riyadda, ya da Dohada keçiriləcəyini, iki həftə ərzində isə ilkin görüşün baş tutacağını bildirib. Fransa tərəfi Livan ordusundan yaxın illər üçün silah, texnika və maliyyə ehtiyaclarını yeniləməyi xahiş edib ki, donor ölkələr hədəfəyönlü dəstək göstərə bilsinlər.
Fransanın xarici işlər naziri Jan-Noel Barro bu həftə Beyruta səfər edərək konfransa hazırlıq məsələlərini və regiondakı mürəkkəb vəziyyəti müzakirə edəcək. Bu, Barronun Livana üçüncü, lakin Prezident Cozef Aun və Baş nazir Navaf Salamın rəhbərlik etdiyi yeni hökumətin formalaşmasından sonra ilk səfəridir.
Görüşlərin əsas mövzularından biri Hizbullahın tərksilah edilməsi olacaq. Paris Hizbullahın silahları təhvil verməkdən imtina etməsindən və qruplaşmanın rəhbəri Naim Qasemin İranın hədəf alınacağı təqdirdə müharibəyə qoşulmağa hazır olduqları barədə bəyanatlarından ciddi narahatdır. Fransa rəsmiləri xəbərdarlıq edirlər ki, Livanın milli maraqları İran-ABŞ-İsrail qarşıdurmasından kənarda qalmağı tələb edir. Fransanın qiymətləndirməsinə görə, İsrail ilə müharibədən sonra Hizbullahın hərbi və maliyyə imkanları zəifləsə də, qruplaşma hələ də zorla tərksilaha müqavimət göstərmək gücündədir. Lakin Paris vurğulayır ki, silahların təhvil verilməməsi həm Hizbullah, həm də Livan üçün ağır bədələ səbəb olacaq və İsrailə gərginliyi artırmaq üçün əsas verəcək.
İqtisadi müstəvidə Fransa Livan hökumətinin maliyyə boşluğunu aradan qaldırmaq üçün hazırladığı qanun layihəsini müsbət addım kimi qiymətləndirir. Bu addım Beynəlxalq Valyuta Fondu (BVF) ilə razılığa gəlmək və beynəlxalq yenidənqurma yardımını cəlb etmək üçün mühüm şərtdir. Rəsmi Paris Livan parlamentini kiçik əmanətçilərin 85 faizini qoruyacaq bu layihəni sürətlə qəbul etməyə çağırıb.
Bundan əlavə, Fransanın proqnozlarına görə, Livanda parlament seçkiləri bir neçə aylıq texniki fasilə ilə gələn ilin yayına təxirə salına bilər.