BAKI,AzerVoice, Fərid Mikayılov

Cənubi Avstraliya Universitetində aparılan yeni elmi araşdırma, geniş istifadə olunan ağrıkəsici və hərarətsalıcı dərmanların – ibuprofen və parasetamol – antibiotik müqavimətinin artmasında rol oynadığını üzə çıxarıb.

Mütəxəssislərin sözlərinə görə, bu preparatlar bakterilərdə genetik dəyişiklikləri sürətləndirir və onların antibiotiklərə qarşı daha dayanıqlı olmasına şərait yaradır. Tədqiqat nəticələri göstərib ki, ibuprofen və parasetamol təkbaşına qəbul edildikdə belə müqaviməti artırır, birlikdə istifadə olunduqda isə təsir daha güclü olur.

Alimlər, dərmanların xüsusilə bağırsaq və sidik yolu infeksiyalarına səbəb olan E. coli bakteriyası ilə yanaşı, geniş yayılmış antibiotik ciprofloxacin üzərindəki təsirini araşdırıblar. Nəticədə, bu ağrıkəsicilərin istifadəsi yalnız ciprofloxacin-ə qarşı deyil, müxtəlif siniflərdən olan digər antibiotiklərə qarşı da müqaviməti artırdığı müəyyən olunub.

Tədqiqat çərçivəsində ibuprofen, diklofenak, parasetamol, metformin, tramadol və digər ümumilikdə doqquz dərman da analiz olunub. Nəticələr göstərib ki, antibiotik müqaviməti yalnız antibiotiklərin öz istifadəsi ilə bağlı deyil, digər geniş yayılmış dərmanlarla da əlaqəli ola bilər.

Dünya Səhiyyə Təşkilatının məlumatına görə, antimikrobial müqavimət qlobal səhiyyə üçün əsas təhlükələrdən biridir. Yalnız 2019-cu ildə bakterial müqavimət nəticəsində dünyada 1,27 milyon insan həyatını itirib.