BAKI, AzerVoice, Fərid Mikayılov

İngiltərəli alimlər süd vəzi xərçənginin limfa düyünlərinə yayılmasını izləmək üçün yeni üsul təqdim ediblər. Onların hazırladığı almaz əsaslı sensorlar əməliyyat zamanı metastaz etmiş hüceyrələrin dəqiq müəyyənləşdirilməsinə imkan yarada bilər.

Hazırda həkimlər xərçəngin yayılma dərəcəsini izləmək üçün radioaktiv maddələr və floresan boyalardan istifadə edirlər. Lakin bəzi pasiyentlərdə allergiya riski yaranır, bəzi xəstəxanalar isə radioaktiv materiallarla işləmək üçün zəruri avadanlıqlara malik deyil.

Tədqiqatın müəllifləri bildirirlər ki, əməliyyat öncəsi və ya zamanı xəstənin şişinə manyetik maye yeridilir. Maye metastaz etmiş hüceyrələrlə birlikdə limfa düyünlərinə hərəkət edir. Daha sonra ucu almazla təchiz edilmiş sensor vasitəsilə həmin mayenin izi izlənilir.

İngiltərədə süd vəzi xərçəngi üzrə ixtisaslaşmış cərrah Dr. Stuart Robertson qeyd edib ki, hazırda metastazı təyin etmək üçün istifadə edilən manyetik sensorlar mövcuddur. Onun fikrincə, almaz texnologiyasının əlavə edilməsi bu metodların “daha da optimallaşdırılmasına” kömək edə bilər.

Yeni texnologiya həm pasiyentlər üçün daha təhlükəsiz alternativ hesab olunur, həm də əməliyyatlarda xərçəngin yayılma dərəcəsinin daha dəqiq müəyyən edilməsinə imkan yaradır. Bu yanaşmanın geniş tətbiqi süd vəzi xərçəngi ilə mübarizədə mühüm irəliləyiş ola bilər.