BAKI,AzerVoice

İsrail mediasının bu gün yaydığı məlumata görə, baş nazir Benyamin Netanyahu ilə İsrail Ordusunun baş qərargah rəisi Eyəl Zamir arasında ötən gecə keçirilən təhlükəsizlik müşavirəsində Qəzzanın gələcəyi ilə bağlı planlara dair kəskin söz atışması yaşanıb.

AzerVocie xəbər verir ki, Netanyahu Qəzza əhalisinin böyük əksəriyyətinin cənuba köçürülməsi planının hazırlanmasını əmr edib. Lakin bu təklif İsrail ordusunun rəhbərliyində ciddi narazılıq yaradıb.

"Hərbi idarəetməmi istəyirsiniz? İki milyon insana kim nəzarət edəcək?" – bu sualla Zamir Netanyahunun planını sorğulayıb. "Times of Israel" portalının yaydığı məlumata görə, Netanyahu bu sual qarşısında səsini yüksəldərək Zamirə belə cavab verib:

"Mən hərbi idarəetmə istəmirəm. Amma HƏMAS-ı heç bir halda arxamızda qoymağa hazır deyiləm. Mən buna icazə verməyəcəyəm!"

Netanyahu əlavə edib ki, əgər köçürmə planı həyata keçirilməzsə, alternativ bütün zolağın işğalı və tam nəzarətə alınması olacaq – bu isə girovların öldürülməsi deməkdir.
"Bu mənim istədiyim deyil, mən buna hazır deyiləm."-deyə o qeyd edib.

Zamir isə buna cavab olaraq xəbərdarlıq edib və bildirib ki,"Bu məsələni ciddi müzakirə etməliyik. Biz bu planı təsdiqləməmişik. Ac və qəzəbli insanlara nəzarət cəhdləri tam nəzarət itkisinə səbəb ola bilər və nəticədə bu insanlar İsrail ordusuna qarşı çıxa bilərlər."

Müzakirənin sonunda Netanyahu əmrini təkrarlayaraq, "Köçürmə planını hazırlayın. Vaşinqtondan qayıdanda onu görmək istəyirəm."- deyib

Bu gərginlik, İsrail hökuməti daxilində Qəzza ilə bağlı gələcək strategiyanın müəyyənləşdirilməsində ciddi fikir ayrılıqlarının olduğunu ortaya qoyur.