BAKI, AzerVoice, Nailə Babazadə

Misir Prezidenti Əbdülfəttah əs-Sisi çərşənbə günü bildirib ki, Fələstin məsələsi Yaxın Şərqdə hələ də “prioritetlərin önündə” dayanır.

AzerVoice xəbər verir ki,Davos Dünya İqtisadi Forumu çərçivəsində keçirilən panel müzakirəsində çıxış edən Misir lideri vurğulayıb ki, Fələstin məsələsinin həlli regional sabitliyin əsas şərti və ədalətli, hərtərəfli sülhün əldə olunması üçün mühüm təməl hesab olunur.

Əs-Sisi ABŞ Prezidenti Donald Trampın Qəzzada İsrail–HƏMAS müharibəsini dayandıran atəşkəsin əldə olunması istiqamətində göstərdiyi səyləri də yüksək qiymətləndirib. Qeyd edək ki, sözügedən atəşkəs ötən ilin oktyabr ayında əldə olunub.

Misir Prezident Administrasiyasının məlumatına görə, Əbdülfəttah əs-Sisi və Donald Trampın Davosda görüşməsi gözlənilir. Bu, ABŞ-ın Qəzzada müharibənin dayandırılması ilə bağlı planının ikinci mərhələsini elan etməsindən sonra iki lider arasında baş tutacaq ilk görüş olacaq.

Xatırladaq ki, Sisi və Tramp sonuncu dəfə ötən ilin oktyabr ayında Misirin təşəbbüsü ilə İsrail–HƏMAS müharibəsinə son qoymaq məqsədi daşıyan atəşkəs razılaşmasının imzalanması üçün təşkil edilən sammit çərçivəsində Şarm əl-Şeyx kurort şəhərində görüşüblər.