BAKI, AzerVoice

Qəzzada xəstəxanalar dağılmaq üzrədir - bir neçə saat ərzində qəbiristanlığa çevrilə bilər.

AzerVoice xəbər verir ki, Qəzza zolağındakı Şifa Xəstəxanasının direktoru Məhəmməd Əbu Silmiyye xəstəxanaların fəaliyyətini davam etdirmək üçün kifayət qədər yanacağın qalmadığını bildirib.

Onun sözlərinə görə, bir neçə saat ərzində generatorlar dayanarsa, xəstəxanalar insanların həyatını xilas edən yerlərdən ölümün hökm sürdüyü məkana çevriləcək.

Əbu Silmiyye qeyd edib ki, xəstəxananın gündəlik təxminən 1700 litr yanacağa ehtiyacı var, lakin hazırda cəmi 1000 litr ehtiyat mövcuddur və bu, bir neçə saatlıq ehtiyacı ödəyir. Dializ və bəzi şöbələrin artıq bağlandığını, yalnız reanimasiya və cərrahiyyə bölmələrinin fəaliyyət göstərdiyini bildirib.

“13 reanimasiya xəstəsi, 17 körpə, onlarla yaralı ölüm təhlükəsi altındadır” – deyə Əbu Silmiyye bildirib və əlavə edib ki, yanacaq çatışmazlığı səbəbindən yaxın saatlarda xəstəxana tamamilə fəaliyyətini dayandıra bilər.

Xatırladaq ki, bölgədə dərman və tibbi ləvazimat çatışmazlığı da kritik həddədir. Əbu Silmiyyənin sözlərinə görə, Qəzzədə hər 10 nəfərdən yalnız 1-i qan verə bilir, çünki əhalinin əksəriyyəti aclıq və zəiflikdən əziyyət çəkir.

Qeyd edək ki, Ümumdünya Səhiyyə Təşkilatı və digər humanitar qurumlar dəfələrlə bölgədə təcili yardım və tibbi ehtiyacların təmin edilməsi üçün sərhədlərin açılmasına çağırış edib.