BAKI,AzerVoice Analitik Təhlil Mərkəzi

Britaniya mandatı dövründə Fələstində (1937–1947) təxminən 67 min yəhudi fələstin vətəndaşlığı almaq üçün rəsmi müraciət edib. Sızdırılmış gizli sənədlər göstərir ki, bu şəxslərdən biri də sonradan İsrailin prezidenti olmuş Şimon Peres idi.

Məlumata görə, Peres 1937-ci ildə - yəni İsrail dövlətinin 1948-ci ildə yaradılmasından on bir il əvvəl - Fələstin vətəndaşlığı üçün ərizə təqdim edib. O, həmin vaxt Britaniya mandatı altındakı Fələstinə mühacir kimi gəlmiş və kənd təsərrüfatı sahəsində çalışan bir fəhlə idi.
Müraciətində o, “fələstin hökumətinə sədaqət və etimadla xidmət edəcəyinə” and içmiş, həmçinin adını “Şimon” olaraq dəyişmək istədiyini bildirmişdi.

Açıqlanan məlumatlara əsasən, 1937–1947-ci illər arasında vətəndaşlıq üçün müraciət edənlərin əksəriyyəti Şərqi Avropa ölkələrindən gələn yəhudilər idi. Onların bir çoxu 1948-ci ildə İsrail dövlətinin elanından sonra yeni hökumətdə yüksək vəzifələr tutmuşdu.

Peresin vətəndaşlıq ərizəsi sənədlərini İsraildə nəsil və soy araşdırmaları ilə məşğul olan bir şirkət aşkarlayıb. Şirkət bu rəsmi və gizli sənədləri İsrail Dövlət Arxivindən əldə edib. Həmin sənədlər arasında Britaniya mandat hakimiyyətinə təqdim olunmuş, Şimon Peresin öz əlyazması ilə imzalanmış ərizə forması da var. Sənəddə qeyd olunur ki, o zaman kənd təsərrüfatı işində çalışan Peres öz adını “Şimon” şəklində rəsmiləşdirmək istəyib.

Beləliklə, bu sənədlər İsrailin siyasi tarixində az tanınan bir faktı - ölkənin gələcək prezidentinin bir zamanlar Fələstin vətəndaşlığı üçün müraciət etdiyini üzə çıxarır.