Bakı,AzerVoice, Orxan Qədirzadə

ABŞ administrasiyası Qəzza zolağında İsrailin nəzarətində olan bölgələrdə fələstinlilər üçün alternativ yaşayış məntəqələrinin inşası üzərində işləyir. AzerVoice xəbər verir ki, bu barədə məlumatı The Wall Street Journal ABŞ, İsrail və ərəb rəsmilərinə istinadən yayıb.

Nəşrin məlumatına görə, məqsəd müharibədən sonra Qəzzanın bərpası prosesində mülki əhali üçün təhlükəsiz ərazilər yaratmaq və HƏMAS-ın nəzarətində olan ərazilərdən insanların çıxmasını təşviq etməkdir. Layihə ABŞ Prezidenti Donald Trampın Qəzza ilə bağlı 20 maddəlik planında nəzərdə tutulan HƏMAS-ın tamamilə silahsızlaşdırılması və hakimiyyətdən uzaqlaşdırılması hədəfinin fonunda irəli sürülür.

Məqaləyə əsasən, ABŞ rəsmiləri bu əraziləri “yaşıl zona” kimi xarakterizə edir. Bu zonalarda yeni yaşayış məntəqələrinin salınması üçün ABŞ-ın rəhbərlik etdiyi mühəndis qrupları İsrailin cənubunda yerləşən Mülki-Hərbi Koordinasiya Mərkəzində planlaşdırma aparır, həmçinin dağıntıların və partlamamış sursatların təmizlənməsi ilə məşğuldur.

Yeni yaşayış massivlərində müvəqqəti mənzillər, məktəblər və xəstəxanaların qurulması planlaşdırılır. ABŞ rəsmilərinin sözlərinə görə, bu məntəqələr həm məcburi köçkünlərin yerləşdirilməsi, həm də müharibədən sonra genişmiqyaslı bərpa işləri üçün model rolunu oynaya bilər.

İlkin olaraq yeni şəhərciklərin Qəzzanın Misirlə sərhəddə yerləşən və İsrail qüvvələri tərəfindən böyük ölçüdə dağıdılmış Rəfah şəhərində tikilməsi nəzərdə tutulur. Şəhər may ayından bəri tamamilə İsrail nəzarətindədir. Layihə hələ ilkin mərhələdədir.

Hesabata əsasən, oktyabr ayında imzalanmış atəşkəs razılaşmasından sonra Qəzza faktiki olaraq Qərb hissəsi və Şərq hissəsi olmaqla iki zonaya bölünüb.

Qərb hissəsi HƏMAS nəzarətindədir və fələstinlilərin əksəriyyəti burada yaşayır.

Şərq hissəsi isə İsrail nəzarətindədir.