BAKI,AzerVoice, Orxan Qədirzadə

İsrail ordusu 2023-cü il 7 oktyabrda HƏMAS tərəfindən həyata keçirilən, ölkə tarixinin ən ağır hücumu sayılan basqının qarşısının alınmamasına görə bir neçə yüksək rütbəli zabiti cəzalandırıb.

AzerVoice xəbər verir ki, ordunun bazar günü yaydığı açıqlamaya əsasən, üç general vəzifədən azad edilib, bir neçəsi isə intizam məsuliyyətinə cəlb olunub. Vəzifədən azad edilənlər arasında həmin dövrdə hərbi kəşfiyyatın rəhbəri olan diviziya komandiri də var.

Ordunun məlumatında bildirilir ki, hər üç general HƏMAS-ın Qəzza zolağından başladığı hücumun vaxtında qarşısının alınmamasına görə şəxsi məsuliyyət daşıyır. Qeyd olunur ki, onların hamısı artıq daha əvvəl istefa vermişdi.

Bundan əlavə, dəniz qüvvələrinin və hava qüvvələrinin komandanlarına qarşı intizam tədbirləri görülüb. Daha dörd general və bir neçə yüksək rütbəli zabit barəsində də araşdırma başlanılıb.

Bu qərar, Baş qərargah rəisi Eyal Zamirin iki həftə əvvəl “sistemli araşdırma” çağırışından sonra verilib. İctimai təzyiqə baxmayaraq, hökumətin dövlət komissiyasının yaradılmasını gecikdirməsi tənqidlərə səbəb olub.

Ayın əvvəlində Zamirin yaratdığı ekspert komissiyasının hesabatı açıqlanmışdı. Hesabat orduda “uzunmüddətli sistem və təşkilati çatışmazlıqların” mövcud olduğunu, həmçinin “xəbərdarlıq siqnalının qaldırılmasına imkan verməyən kəşfiyyat uğursuzluğunu” üzə çıxarmışdı. Komissiya bildirib ki, ordu hücumdan əvvəl “yüksək dəqiqlikli və əhatəli kəşfiyyat məlumatlarına” malik olsa da, qərarvermə və qüvvələrin yerləşdirilməsi proseslərində ciddi çatışmazlıqlara yol verib.

Hesabat ordunun komanda zəncirində geniş miqyaslı idarəçilik problemlərinin olduğunu da təsdiqləyib.