BAKI, AzerVoice Analitik Təhlil Mərkəzi– Misir Prezidenti Əbdülfəttah əs-Sisi ABŞ Prezidenti Donald Trampa müraciət edərək, Qəzza zolağındakı müharibənin dayandırılması və humanitar yardımın bölgəyə çatdırılması üçün bütün səyləri göstərməyə çağırıb. Bu müraciət, Misirin deyil, İsrailin məsuliyyət daşıdığı humanitar böhranı Misirin üzərinə yükləməyə çalışan çoxistiqamətli kampaniyalar fonunda səsləndirilib.
Misir: Rafah keçidi açıqdır, məsuliyyət İsrailin üzərinə düşür
Prezident Sisinin Trampa ünvanladığı müraciət, müşahidəçilər tərəfindən Vaşinqton üçün xəbərdarlıq kimi qiymətləndirilir. Onlar bildirirlər ki, Qəzzadakı böhran yalnız Misirin deyil, ABŞ daxil olmaqla bütün regional və beynəlxalq oyunçuların nüfuzuna zərər verə bilər.
Misir rəsmiləri bildirirlər ki, Rafah sərhəd-keçid məntəqəsi Misir tərəfdən açıqdır. Yardımların keçidini isə İsrailin Qəzzanın infrastrukturunu məhv etməsi və sərhədləri tamamilə bağlaması əngəlləyir. Qahirə bu məsələdə məsuliyyətin üzərinə yüklənməsini qətiyyətlə rədd edir.
İsrailin təxribat ssenarilərindən narahatlıq
Prezident Sisi öz çıxışında Qəzzada yaranmış ağır humanitar şəraitin nəticələrindən, eləcə də İsrailin mümkün təxribat ssenarilərindən narahatlıq ifadə edib. O, beynəlxalq ictimaiyyətə müraciət edərək, müharibənin dərhal dayandırılmasına və yardım keçidlərinə şərait yaradılmasına çağırıb:
“Bu çətin dövrdə bütün dünya ölkələrinə, Avropa İttifaqına, ABŞ-a və ərəb qardaşlarımıza müraciət edirəm. Biz müharibəni dayandırmaq və humanitar yardımı təmin etmək üçün bütün gücümüzlə çalışırıq.”-deyə o bildirib.
Yardımlar yenidən başladı
Uzun fasilədən sonra onlarla yardım yük maşını bazar günü Misirdən Qəzzaya yola düşüb. Bu addım beynəlxalq ictimaiyyətin artan təzyiqləri və aclıq təhlükəsi ilə bağlı humanitar təşkilatların xəbərdarlıqlarından sonra atılıb. Misir, Qəzza sakinlərinin sərhədi keçmək istəməsi halında ciddi təhlükəsizlik və siyasi nəticələrlə üzləşə bilər. Qahirə, nə sərhədi güc tətbiq etməklə bağlamaq, nə də miqrant axınına icazə vermək variantlarını istəmir.
Misir parlamentinin müdafiə və təhlükəsizlik komitəsinin üzvü, general Yəhya Kədvani bildirib ki, Prezident Sisinin çıxışı Misir əleyhinə yönəlmiş təbliğata açıq cavabdır. Onun sözlərinə görə, Qahirə hər zaman Fələstin məsələsində ədalətli və ardıcıl mövqe nümayiş etdirib və Qəzzaya daxil olan yardımların 80%-ni təkbaşına təmin edib.
“Misir heç vaxt məcburi köçürmə ideyasını qəbul etməyib. Prezidentin sözləri bütün xalqın mövqeyidir, yalnız az sayda dövlət əleyhdarı istisna təşkil edir.”-deyə Kədvani əlavə bildirib.
Misirdəki bəzi siyasi dairələr HƏMAS lideri Xəlil əl-Həyyənin son çıxışını tənqid edərək, onun sözlərinin “Müsəlman Qardaşları”nın dövlətə qarşı mənfi ritorikasına uyğun olduğunu bildiriblər. Misirin tanınmış israilli məsələlər üzrə eksperti Səid Ukkaşa qeyd edib ki, Qahirə vəziyyəti diplomatik yollarla idarə etməyə çalışır və təxribat ritorikasına uymur.
Ekspertlər qeyd edir ki, Prezident Sisinin çıxışı, Misirin HƏMAS-la qarşıdurmaya gedəcəyi və ya vasitəçilik rolundan imtina edəcəyi ilə bağlı şübhələri aradan qaldırıb. Misir, Fələstin məsələsinin öz milli təhlükəsizliyi üçün vacib olduğuna inanır və bölgədəki böhranın həllinə töhfə verməyə davam edəcəyini göstərir.