BAKI, AzerVoice, Nailə Babazadə
Balıkesir şəhərinin Sındırgı rayonunda baş verən 6,1 bal gücündə zəlzələdən sonra 330 yeraltı təkan sarsıntı qeydə alınıb.
AzerVoice xəbər verir ki, Türkiyənin Fövqəladə Hallar və Təcili Yardım İdarəsi (AFAD) məlumatına görə, dünən saat 23:48-də Sındırgı rayonunda 6,1 bal gücündə zəlzələ olub.
Zəlzələ yalnız Balıkesir deyil, həmçinin İzmir, Bursa, İstanbul, Tekirdağ, Kocaeli və Sakarya daxil olmaqla Marmara və Egey bölgələrinin bir çox şəhərində hiss edilib. Zəlzələnin dərinliyi 5,99 kilometr olaraq müəyyən olunub.
6,1 bal gücündəki əsas zəlzələdən sonra, dünən saat 23:48-dən bu gün saat 12:00-dək təxminən 13 saat ərzində ümumilikdə 330 yeraltı təkan qeydə alınıb.
Sismik monitorinq statistikasına görə, 6,1 bal gücündəki əsas sarsıntıdan dərhal sonra bölgədə seysmik fəaliyyət artıb. Onlardan 12-si 4 bal və daha yüksək gücə malik artçılar olub.
Qeyd edək ki, dünən gecə Sındırgı mərkəzli 6,1 bal gücündə zəlzələ baş vermiş, bu zəlzələ İstanbul və ətraf şəhərlərdə də hiss olunmuşdu. Türkiyə Daxili İşlər naziri Ali Yerlikaya zəlzələdən sonra bildirib ki, ölüm halı qeydə alınmayıb, lakin istifadəsiz 3 bina və 1 dükan dağılıb. Tədbir məqsədilə Balıkesir şəhərində bütün məktəblər bir gün bağlanıb.
Həmçinin, Balıkesir Sındırgı zəlzələsi Manisa şəhərinə də təsir göstərib. 26 evdə zərər aşkarlanıb və bir çox insan panik səbəbindən xəsarət alıb. Manisa valisi Vahdettin Özkan 5 rayonda təhsilə bir günlük fasilə verildiyini açıqlayıb.
Özkan bildirib ki, Akhisar, Demirci, Kırkağaç, Soma və Gördes rayonlarında təhsil bu gün üçün dayandırılıb.