BAKI, AzerVoice, Orxan Qədirzadə

ABŞ prezidenti Donald Tramp Qəzza zolağında təhlükəsizliyin təmin olunması məqsədilə yaradılan Beynəlxalq Sabitləşdirmə Qüvvəsinin artıq fəaliyyət göstərdiyini və prosesə yeni ölkələrin qoşulacağını bildirib.

AzerVoice-un məlumatına görə, Tramp bu barədə bazar ertəsi Ağ Evdə, Oval kabinetdə jurnalistlərə açıqlamasında deyib. ABŞ prezidenti qeyd edib ki, mexanizm formal şəkildə artıq işə salınıb və iştirakçı ölkələrin sayı tədricən artır.

“Düşünürəm ki, müəyyən formada bu qüvvə artıq fəaliyyət göstərir. Getdikcə daha çox ölkə bu prosesə qoşulur. Onlar artıq bu strukturun bir hissəsidir və mənim xahişimə uyğun olaraq istənilən sayda hərbi kontingent göndərə bilərlər”, – deyə Tramp vurğulayıb.

ABŞ prezidenti, həmçinin administrasiyasının İsrailin şənbə günü HƏMAS liderlərindən birini öldürməsi ilə Qəzza üzrə atəşkəs rejimini pozub-pozmadığını araşdırdığını bildirib.

Qeyd edək ki, Qəzza zolağında vəziyyət beynəlxalq ictimaiyyətin diqqət mərkəzində qalmaqda davam edir və bölgədə mümkün sabitləşdirmə mexanizmləri ilə bağlı müzakirələr intensiv xarakter alıb.