BAKI, Azervoice, Nərmin Ağayeva
Türkiyənin dördüncü qazma gəmisi Əbdülhəmid Han Qara dənizdəki Türkali-33 quyusunda yeni missiyasına başlayacaq.
Azervoice xəbər verir ki, “Abdülhamid Han” qazma gəmisi 2022-ci ilin avqustunda istismara verildikdən sonra Aralıq və Qara dənizlərdə cəmi 9 qazma əməliyyatı həyata keçirib. Son olaraq, 2024-cü ilin avqustunda Qara dənizdə Göktəpə-3 quyusunda işə başlayıb və bu işi 2025-ci ilin mayında tamamlayıb.
Prezident Rəcəb Tayyib Ərdoğanın açıqladığı 75 milyard kubmetr qaz kəşfi bu gəmiylə Türkali yatağında, təxminən 3500 metr dərinlikdə aparılan qazma sayəsində həyata keçirilib.
Qazma gəmisi yaxın vaxtlarda Sakarya Qaz Sahəsindəki Türkali-33 quyusunda fəaliyyətə başlayacaq. Türkiyə enerji donanmasını genişləndirərək neft və qaz kəşfiyyatını inkişaf etdirməyə davam edir, regional və beynəlxalq əməkdaşlıqlarla bu sahədə strateji mövqeyini möhkəmləndirir.
Qeyd edək ki, hazırda Türkiyənin enerji donanmasında dörd qazma, iki seysmik tədqiqat gəmisi və bir üzən qaz hasilat platforması fəaliyyət göstərir və daha iki dərin su qazma gəmisi əlavə edilməklə bu potensial artırılacaq.
